11.03.1963
Neðri deild: 51. fundur, 83. löggjafarþing.
Sjá dálk 1485 í B-deild Alþingistíðinda. (1546)
125. mál, sala Utanverðuness í Rípurhreppi
Frsm. meiri hl. (Jón Pálmason):
Herra forseti. Mér dettur nú ekki í hug, eins og gefur að skilja, að fara hér að ræða almennt um jarðakaup og sölu og ábúð og annað slíkt, sem viðkemur landbúnaðinum, þó að síðasti ræðumaður gæfi tilefni til þess, því að það yrði langt mál. En ég hlýt að gera tvær aths. út af hans ræðu.
Hann gekk svo langt, að hann vildi gera mér upp þá skoðun, að ég álíti, að allir þm. væru skyldugir að fylgja sínum fulltrúum í nefnd, landbn, eða öðrum. Ég sagði ekkert um þetta, og mér hefur auðvitað aldrei dottið í hug, að slíkt kæmi til greina. Það hafa allir þm. frjálsar hendur. Ég tók það eitt fram, sem hver þm., getur séð, að það eru fulltrúar þriggja þingflokkanna í landbn., sem eru sammála um þetta mál. Allar bollaleggingar hv. síðasta ræðumanns um öfgaskoðanir frá mér í þessu efni eru alveg út í loftið.
Annað var það, sem hann tók fram hér um bil í byrjun sinnar ræðu, og það var, að það væri nauðsynlegt að fresta málinu, af því að ég hefði lýst því yfir, að það væri um að ræða blekkingu hjá hv. meiri hl. hreppsnefndar þarna norður í Rípurhreppi. Ég er þeirrar skoðunar, og það er ekkert um að villast; hvaða blekking það er, það er ekki nema eitt atriði, og ég er búinn tvisvar að lýsa hér yfir, hvað það er. Þeir halda því fram, að þessi maður, sem er ábúandi á hálfu Utanverðunesi, eigi aðra jörð og geti búið þar. Og ég get upplýst það fyrir hv. þdm., hvaða blekkingu er hér um að ræða, því að þessi maður á þriðjung í lítilli jörð, sem heitir Hróarsdalur, og á jörðinni búa tveir bræður hans, og það er fullerfitt fyrir þá að hafa hana fyrir tvíbýlisjörð, en engum kunnugum manni mundi detta í hug að gera hana að þríbýlisjörð. Þess vegna er þarna frá mínu sjónarmiði og annarra manna í landbn. um blekkingu að ræða, en um aðra hluti er ekki þar að tala.
Allt það, sem hér hefur komið fram, er þess vegna þannig vaxið, að það er engin ástæða til þess að vísa þessu máli til landbn. aftur. Hitt leiðir af sjálfu sér, að hver hv. þm. í d. hefur það á sínu valdi, hvort hann vill samþykkja þetta frv. eða samþykkja það ekki.