16.10.1963
Sameinað þing: 3. fundur, 84. löggjafarþing.
Sjá dálk 2161 í B-deild Alþingistíðinda. (1617)
Olíugeymar í Hvalfirði
Eysteinn Jónsson:
Ég er mjög aðþrengdur orðinn með tíma, eins og menn mega heyra. Þetta verður að vera mjög stutt, en ég taldi mig knúinn að rísa hér upp út af dylgjum hæstv. utanrrh. um, að Framsfl. muni hafa léð máls á miklum hernaðarframkvæmdum í Hvalfirði 1955, og það mætti ráða af því, að það hefði verið gerð einhver áætlun í NATO um sömu mundir og Kristinn Guðmundson hefði verið utanrrh. Mér skilst, að hann vilji koma þeirri skoðun inn hjá mönnum, að eiginlega muni Kristinn Guðmundsson hafa staði$ fyrir áætlun herforingjanna í NATO um það, sem ætti að gera.
En ég vil út af þessu bara segja þetta: Aldrei hef ég samþykkt neinar hernaðarframkvæmdir í Hvalfirði og aldrei félagar mínir í Framsfl., — aldrei. Hvernig ætti þá dr. Kristinn Guðmundsson að hafa gert það? Dettur mönnum í hug, að hann hefði tekið það á sig að fara að samþykkja úti í París einhverjar hernaðarframkvæmdir á Íslandi án þess að tala um það við mig t.d. eða þáverandi formann Framsfl. eða framsóknarmenn yfirleitt? Hvað segja menn um málflutning eins og þennan hjá hæstv. utanrrh.?
Síðan vil ég aðeins segja og skal svo ekki níðast meira á þolinmæði hæstv. forseta: Hæstv. utanrrh. segir: Þetta er ekki flotastöð. — Hann getur kallað það hvað sem honum sýnist. En það, sem kemur til greina að gera, en ég vil vona í lengstu lög að verði hætt við, það er, að NATO byggi nýja olíustöð í Hvalfirði, nýjar bryggjur og hafnarmannvirki og ný legufæri, sem geta verið notuð fyrir herskip og birgðastöð. Hvað er upphaf að flotastöð, ef þetta er það ekki? Hæstv. ráðh. getur kallað það hvað sem honum sýnist.