18.04.1964
Sameinað þing: 68. fundur, 84. löggjafarþing.
Sjá dálk 947 í D-deild Alþingistíðinda. (3439)
214. mál, síldarleit
Fyrirspyrjandi (Gils Guðmundsson):
Herra forseti. Ég þakka hæstv. ráðh. fyrir svörin við fsp. mínum. Það er vissulega gott til þess að vita út af fyrir sig, að nú þegar hafa verið gerðar allmiklar ráðstafanir til þess að bjarga síldarleitinni í bili eða á þessu ári. Og vissulega er sjálfsagt að meta það, að svo hefur verið gert eða ætlunin er að gera það eftir atvikum allmyndarlega. En eins og ég tók fram og lagði áherzlu á í þeim orðum, sem ég sagði áðan, tel ég þessi leiguskip eða þau skip, sem eru fengin tíma og tíma, til þess að sinna síldarleitinni, ekki frambúðarlausn á þeim málum og raunar tók hæstv. ráðh. undir þau orð mín. Við þurfum alveg tvímælalaust að stefna að því að eignast sem allra fyrst a.m.k. 2 hentug og hæfilega stór skip, sem væru sérstaklega búin út til síldarleitar að staðaldri og stunduðu það verk sem aðalviðfangsefni sitt. Og það gefur auga leið. að það setti að verða meiri árangur af leit slíkra skipa heldur en þó að fengin séu skip annað slagið til þess að vinna við síldarleit, sem eru svo tekin til annarra starfa, til leitar fyrir togarana eða til landhelgisgæzlu, vissa hluta ársins. Ég held, að þessi mál séu þá fyrst komin í sæmilegt horf, miðað við þörfina, þegar tvö föst leitarskip væru við síldarleit svo að segja allt árið og síðan væri svo gripið til varðskipa að einhverju leyti eða leiguskipa um mesta annatímann við síldarleitina, þ.e.a.s. yfir hásumarið. Ég er alveg sannfærður um, að þetta mál er mjög mikilvægt þjóðhagslega skoðað og þeir fjármunir, sem í það verða lagðir að búa sem allra bezt að síldarleitinni, eru líklegir til þess að skila sér margfaldlega aftur.