11.02.1965
Neðri deild: 41. fundur, 85. löggjafarþing.
Sjá dálk 800 í B-deild Alþingistíðinda. (664)
104. mál, landgræðsla
Gísli Guðmundsson:
Herra forseti. Hv. 2. þm. Norðurl. v. hefur ekki tekið alveg rétt eftir því, sem ég sagði áðan. Ég sagði ekki, að lögin mundu ekkí koma að neinu gagni án frekari fjáröflunar, heldur voru ummæli mín á þá leið, að sá þáttur, sem fjallaði um landgræðslu, mundi ekki koma að því gagni, sem til var stofnað, nema fjáröflun væri aukin, og um það skildist mér nú raunar að hæstv. ráðh. væri mér sammála. Ég hafði áður gert grein fyrir því, hvaða mun ég teldi vera á því annars vegar, að landgræðslan hefði sérstakan tekjustofn, og fjárveitingu hins vegar, og skal ég ekki hafa um það fleiri orð.
En út af því, sem hv. 5. þm. Vesturl. sagði um tóbakstekjur skógræktarinnar, vil ég segja það, að það getur vel verið, að eitt árið eða svo hafi skógræktin fengið minni tekjur en áætlað hefur verið. En hins vegar hef ég ekki orðið þess var, að skógræktin óskaði eftir því að fá skipti, þannig að af henni væri tekinn þessi sérstaki tekjustofn og hún ætti svo vonina í fjárveitingum frá Alþingi, enda skiljanlegt, að hún vilji ekki skipta á slíku.
Hv. 2. þm. Norðurl. v. hafði orð á því, að fjárveitingar til sandgræðslunnar hafi verið auknar allmjög undanfarin ár, hefðu verið 1958 2 millj., nú komnar upp í 7—8 millj. (Gripið fram í.) Já, það er annaðhvort af því að ég tala lágt eða hv. þm. heyrir ekki vel, nema hvort tveggja sé. Ég skal endurtaka það, sem ég sagði. Hv. þm. hafði orð á því, að fjárveitingar sandgræðslunnar hefðu verið auknar til muna í seinni tíð, mundu hafa verið 2 millj. 1958 og mundu nú vera komnar upp í 7–8 millj., mig minnir, að .hann nefndi þær upphæðir. Honum fer eins og fleirum að finnast upphæðir háar nú á tímum. En þegar við lítum á hinar háu upphæðir nú á tímum, verðum við að gæta þess, að krónan og verðgildi hennar er miklu minna en það var fyrir einum eða hálfum áratug. Til dæmis um það er, að heildarupphæð fjárlaga ríkisins mun þetta ár, sem þm. nefndi, 1958, hafa verið 800–900 millj. kr., en er nú komin nokkuð hátt á 4. milljarð, þ.e.a.s. 4 þús. millj. Þetta þýðir ekki, að veitt sé svona miklu meira verðgildi til allra hluta en áður, heldur er af öðrum ástæðum. Það má vel vera, að verðgildi fyrir þær upphæðir, sem nú eru veittar, sé eitthvað hærra en 1958. Ég er ekki frá því, en það munar ekki mjög miklu, þegar miðað er við fjárlögin í heild.