15.03.1966
Efri deild: 50. fundur, 86. löggjafarþing.
Sjá dálk 797 í B-deild Alþingistíðinda. (618)
11. mál, fuglaveiðar og fuglafriðun
Frsm. (Bjartmar Guðmundsson):
Herra forseti. Ég skal ekki lengja umræður mikið um þetta mál.
Það helzta, sem taldist til raka í hinni hraustlegu ræðu 1. þm. Norðurl. e. (KK), þar sem hann berst fyrir því að viðhalda snöruflekaveiði, sem fyrir löngu er fordæmd af hér um bil öllum, sem til þekkja, — það helzta í rökum hans var sem sé það, að hann benti á, að í fuglaveiðasamþykkt þeirri, sem hefur verið í gildi og er í gildi enn, séu ströng fyrirmæli um það, hvernig ganga eigi frá flekum eða vakta þá, svo að þeir losni ekki upp eða liggi í sjónum langan tíma, þar til fuglinn er tekinn af þeim. Og hann telur, að enn betur muni mega frá þessu ganga. Ég skal ekki fullyrða um það, hvort eitthvað megi betur frá þessum hlutum ganga en verið hefur, en ég hygg þó, að sjórinn, sjávarföll, kvika og brim, náttúruöflin sjái um það, að þarna sé ekki tryggilega hægt frá að ganga. Og á meðan þessi ströngu fyrirmæli um ákvæði um fuglaveiðasamþykkt voru í gildi, var þó ekki betur hægt um að búa hnútana en svo, að það er aðelns örstutt síðan ein niðurstaða, sem svo mun vera kölluð, fannst á reki inni á Eyjafirði, fimm flekar samfastir, með mörgum fuglum á, sem höfðu farið á flekann á ýmsum tímum, og sjónarvottur, sem horfði á flekann, sagði mér frá, að það hefði verið ófögur sjón að sjá. Og einn þessi fleki var tekinn og fluttur hingað til Reykjavíkur og er geymdur hér sem sýnishorn um þessar veiðar.
Hv. þm. vildi gera mikið úr því, að það væri verið að svipta Grímseyinga og þá, sem stunda veiðar við Drangey, einhverjum stórum tekjustofni. Hann meira að segja kvað svo fast að orði, að þetta væri spor í áttina til þess að leggja Grímsey í eyði. En sjálfir hafa Grímseyingar gefið upp, hversu miklar tekjur þeir hafa af þessu, og þær eru mjög óverulegar og geta engin áhrif haft á afkomu eyjabúa í heild. Mér er sagt, að aðeins örfáir menn stundi þessar veiðar við Drangey, en þeir hafi að vísu einhverjar þó nokkrar tekjur af. Hv. þm. var að bera saman þessa veiðaðferð við aðrar, sem ekki eru góðar, og ég skal taka alveg undir það. En það er ekki mikil bót í máli, þó að hægt sé að benda á einhverjar fleiri veiðiaðferðir, sem ætti að nema í burtu, og ég fyrir mitt leyti vildi gjarnan stuðla að því. Þó að það sé að vísu ekki hægt að koma í veg fyrir öll leiðinleg atvik og fyrirbæri í sambandi við fuglaveiðar, mætti þar sjálfsagt fleira bæta en þetta.
Ég skal svo ekki ræða um þetta mál lengur. Ég tel eðlilegt, að hv. dm. sýni afstöðu sína til þessarar veiðiaðferðar með atkvgr. eins og við aðrar greinar frv. og brtt., og mun að sjálfsögðu ekki skipta mér af því, hvernig einstakir menn greiða atkv. En mér finnst óaðgengilegt og að það sé jafnvel ekki siður óaðgengilegt fyrir þá menn, sem stunda þessar veiðar enn, að leyfa þær lengur en er.