12.12.1966
Neðri deild: 25. fundur, 87. löggjafarþing.
Sjá dálk 501 í B-deild Alþingistíðinda. (316)
74. mál, verðstöðvun
Halldór E. Sigurðsson:
Herra forseti. Ég skal ekki fara að blanda mér hér inn í umr. og allra sízt fara að gera neitt stáss með þetta frv. hæstv. ríkisstj. En það var út af brtt. hæstv. forsrh., sem mig langar að fá skýringu. Brtt. er fólgin í því, að þar segir svo, með leyfi hæstv. forseta:
„Fyrirmæli fyrri málsgr. þessarar gr. taka á hliðstæðan hátt til seldrar þjónustu og framlags, í hvaða formi sem er, þ. á m. hvers konar framlags og þjónustu, sem ríki, sveitarfélög og stofnanir þeirra og aðrir opinberir aðilar láta í té gegn gjaldi.“
Það er orðið „framlag“, sem sett er hér inn í þessa gr., og ég leyfi mér að spyrja hæstv. forsrh.: Hvað er átt við með orðinu „framlag“ í þessu tilfelli? Mér dettur í hug, að jafnhliða því, að við erum að ræða þetta frv. hér í hv. d., var verið að útbýta till. fjvn. við 3. umr. fjárl. Þar eru t.d. framlög til skóla. Nær þetta orð í þessu tilfelli til þeirra? Hefur t.d. hæstv. ríkisstj. vald skv. því til þess að ákveða, að framlög ríkisins til slíkra framkvæmda séu bundin við sömu fjárhæð eða sama hlutfall og á s.l. ári? Ef það væri meiningin með þessu orði, sem hér er skotið inn í gr., væri hér um nýjan þátt í málinu að ræða. Þess vegna leyfi ég mér að spyrja hæstv. forsrh.: Hvað er átt við með orðinu „framlag“ í þessari brtt ?