17.11.1966
Efri deild: 16. fundur, 87. löggjafarþing.
Sjá dálk 595 í B-deild Alþingistíðinda. (382)
62. mál, verðlagsráð sjávarútvegsins
Félmrh. (Eggert G. Þorsteinsson):
Herra forseti. Frv. það, sem hér um ræðir, er ekki mikið að vöxtum, eins og hv. alþm. er ef til vill þegar kunnugt af lestri þess. Sú eina breyt. er fólgin í þessu frv. frá gildandi l. um verðlagsráð sjávarútvegsins, að með samþykkt þessa frv. yrði tekinn inn liður, sem hefur valdið ákaflega miklum erfiðleikum í sambandi við verðlagningu á sjávarafurðum undanfarin ár, en það er úrgangshlutinn, sem hefur verið nánast utan starfssviðs verðlagsráðs, fiskúrgangur, og hefur orðið að semja um hann eftir ýmsum óákveðnum og tilviljunarkenndum leiðum á undanförnum árum, en með þessu frv. er hugsað að bæta úr á þann veg, að verðlagsráð skuli einnig ákveða verð á fiskúrgangi jafnframt öðrum ákvörðunum, sem það skal taka skv. gildandi lögum.
Í sambandi við umr. um verðlagsráð sjávarútvegsins að undanförnu hefur gætt æðimikils misskilnings, sem ég tel rétt að nota hér tækifærið til að leiðrétta, og vildi í því sambandi taka fram eftirfarandi:
1) Frá því lögin um verðlagsráð sjávarútvegsins komu til framkvæmda í ársbyrjun 1962 og þar til í árslok 1964, er lagabreytingin gekk í gildi, tók yfirnefnd 11 verðákvarðanir, 7 voru gerðar með atkv. oddamanns og fulltrúa kaupenda gegn atkv. annars eða beggja fulltrúa seljenda, 3 voru gerðar með atkv. oddamanns og fulltrúa seljenda gegn atkv. kaupenda eða með hjásetu þeirra og 1 var gerð með úrskurði oddamanns eins.
2) Frá því að breytingin á verðlagsráðstöfunum gekk í gildi, frá ársbyrjun 1965, hefur yfirnefnd tekið 21 verðákvörðun, þar af hafa 3 verið teknar með almennu samkomulagi, 5 hafa verið teknar með atkv. oddamanns og fulltrúa fiskkaupenda gegn atkv. fiskseljenda, en 13 hafa verið teknar með atkv. oddamanns og fulltrúa fiskseljenda gegn atkv. kaupenda.
3) Þetta yfirlit sýnir ljóslega, að breyting laganna á árinu 1964 hefur leitt til mun hagkvæmari niðurstöðu fyrir seljendur en áður var. Sú breyt. fól tvennt í sér: a) að settur var fastur oddamaður, forstjóri Efnahagsstofnunarinnar eða fulltrúi hans; b) að mælt var svo fyrir, að taka skyldi tillit til kostnaðar bæði við vinnsluna og við öflun hráefnis.
Það getur verið nokkurt álitamál, hversu margar verðlagningar skulu teljast, þegar margar ákvarðanir hafa verið teknar í einu og eru oft felldar inn í einu og sömu verðlagninguna. Í yfirlitinu hefur þeirri reglu verið fylgt, að telja verðlagningu á síld til bræðslu, frystingar og söltunar sérstaka verðlagningu, enda þótt ákvarðanir hafi verið teknar um þau atriði í einu lagi. Þetta atriði tel ég vegna opinberra umræðna um störf verðlagsráðs vera nauðsynlegt að kæmi hér fram.
Um frv. sjálft vil ég að öðru leyti vísa til þeirrar grg., sem því fylgir, og upphafsorða minna hér, þar sem ég tel ekki frekari skýringa þörf á framgangi málsins.
Ég legg til, herra forseti, að að lokinni þessari umr. verði frv. vísað til hv. sjútvn.