11.12.1968
Sameinað þing: 19. fundur, 89. löggjafarþing.
Sjá dálk 720 í D-deild Alþingistíðinda. (3735)
272. mál, Aflatryggingasjóður
Félmrh. (Eggert G. Þorsteinsson):
Herra forseti. Ég hef óskað eftir því við Aflatryggingasjóð, að hann svaraði efnislega þessari fsp., og geri ég hans svör að mínum, en þau eru svo hljóðandi:
1. Endurskoðun laga sjóðsins hefur dregizt á langinn af ýmsum ástæðum. Málið er yfirgripsmikið, en jafnframt viðkvæmt og skoðanir skiptar um núgildandi lög og á hvern hátt ber að breyta þeim, bæði meðal útvegsmanna og sjómanna sjálfra. Eru skoðanir þessar einnig að miklu leyti ríkjandi meðal fulltrúa þessara aðila í n., sem að þessari endurskoðun vinnur.
Svo sem kunnugt er, eiga sæti í n. alls 7 menn, tveir fulltrúar samtaka útvegsmanna og sjómanna, hvorra um sig, einn fulltrúi yfirmanna, einn tilnefndur af Fiskifélaginu og formaður, sem er skipaður af ráðh. Mikil vinna hefur verið lögð í ýmsa undirbúningsvinnu og eru nm. sammála um ýmsar brtt. við núgildandi lög. Um aðrar breytingar, sem margar hverjar má kalla veigamiklar, eru nokkuð skiptar skoðanir og jafnvel alldjúpstæður ágreiningur. N. reynir að sjálfsögðu að ná eins víðtækri samstöðu og kostur er og mun skjótlega geta skilað áliti.
2. Greiðslur úr sjóðnum hafa verið sem hér segir: Í togaradeild 1966 19.1 millj. Á árinu 1967 voru í togaradeild greiddar 10.1 millj. Í almennu deildinni voru árið 1966 greiddar 20.5 millj. og vegna ársins 1967 49.2 og aftur á þessu ári 17.7 millj. og 32.4 millj. vegna ársins 1968. Í síldveiðideildinni voru greiddar árið 1966 5.3 millj., en árið 1967 fyrst 25.3 millj. og síðar 17.5 millj. og á árinu 1968 31 millj. Samtals er þetta á árinu 1966 44.9 millj. og tvær tölur eru fyrir árið 1967, sú fyrri 74.5 millj. og hin síðari 45.3 millj. Á þessu yfirstandandi ári til 30. nóv. s.l. hafa verið greiddar 63.4 millj. Enn er ólokið greiðslum vegna sumar– og haustúthalds 1968, nema þá aðeins sumarsíldveiðanna. Áætla má bætur vegna annars sumarúthalds, þ.e. til 15. sept. 1968 samtals um 17 millj. kr. Útlit er einnig fyrir töluverðar bætur vegna haustúthaldsins, en þær eru enn óvissar.
3. Tekjur ársins 1967 voru sem næst 69.3 millj. kr., þar af framlag úr ríkissjóði 23.1 millj. Nákvæm sundurliðun er enn ekki fyrirliggjandi frá ríkisbókhaldinu. Tekjur ársins 1968 eru ekki endanlega þekktar. Auk þess breytir gengisbreytingin tekjuáætluninni töluvert. Fyrir gengisbreytinguna var haldið með nokkru öryggi, að þær mundu nema 60–62 millj. kr., þar af ríkissjóðsframlag 14–16 millj. Samkv. fjárl. 1968 var ríkissjóðs framlag skert um þriðjung.
Eins og sjá má á ofangreindum tölum, hefur allmikið gengið á innistæður Aflatryggingasjóðs.