12.11.1969
Sameinað þing: 12. fundur, 90. löggjafarþing.
Sjá dálk 662 í D-deild Alþingistíðinda. (3534)
52. mál, lán og styrkveitingar atvinnumálanefndar ríkisins
Jón Skaftason:
Herra forseti. Ég vil, eins og sá hv. þm., sem áðan var í ræðustól, þakka hæstv. forsrh. fyrir þær upplýsingar, sem hann gaf okkur, og ég vil taka undir það hjá honum, út af þeirri skýrslu, sem við höfum nú í höndunum, hv. þm., að hún sýnir vinnubrögð, sem ber að lofa, og æskilegt væri að tekin yrðu upp eitthvað svipuð vinnubrögð í ýmsum hliðstæðum tilvikum eins og hér er um að ræða. Ég stend hér upp til þess að vekja athygli á því, eins og menn rennir grun í, að ég tel, að við úthlutun á fé, bæði frá atvinnumálanefnd ríkisins og þá ekki síður frá svo kölluðum Atvinnujöfnunarsjóði, þá hafi hagsmunir eins kjördæmis verið sérstaklega fyrir borð bornir, ef um leið er litið til annarrar fyrirgreiðslu af hálfu hins opinbera, sem líka hefur komið mjög misjafnt niður á hin einstöku kjördæmi. Af þeirri skýrslu, sem liggur hér frammi og er nr. 1, sést skipting á lánum úr þremur veigamiklum sjóðum í landinu, þ.e. frá atvinnumálanefnd ríkisins, frá Atvinnujöfnunarsjóði og frá Fiskveiðasjóði, sem er nú vafasamt, að mínu viti, að eigi samleið, þegar þessi samanburður er gerður við hina sjóðina tvo. En hvað um það. Af skýrslunni, sem er nr. 2 á blaði, sést, að af heildarútlánum atvinnumálanefndar ríkisins hafa aðeins komið 5.1% í hlut Reykjaneskjördæmis, og eru öll önnur kjördæmi landsins, nema Vestfirðir einir, með hærra hlutfall. Ég veit ekki eftir hvaða reglum er farið, þegar slík niðurstaða er fengin, því að upplýsingar er á þessu sama blaði að finna um, að ekki getur við þessa úthlutun verið miðað við mannfjölda og ekki getur heldur verið miðað við tölu atvinnulausra manna í kjördæmunum, þegar þessi skipting er ákveðin. Þannig hljóta aðrar reglur, sem ég þekki ekki, að hafa ráðið því, að hlutur Reykjaneskjördæmis af fjármagni því, sem atvinnumálanefnd ríkisins úthlutaði, er svo gersamlega fyrir borð borinn. Til viðbótar þessu vil ég nefna, að allt til þess að hæstv. forsrh. lýsti því yfir áðan, að ákvörðun hefði verið tekin um að lána einu fyrirtæki í Kópavogi einhverja fjárhæð af þessum peningum, þá var ástandið þannig, að í þessum stærsta kaupstað landsins hafði ekki einu einasta atvinnufyrirtæki verið ætluð ein einasta króna af þessum 241 millj., eða 300 millj. eftir því við hvora töluna menn vilja miða. Ekki ein einasta króna af þessu mikla fjármagni hafði komið einu einasta atvinnufyrirtæki í Kópavogi til góða, og svipaða sögu má segja um hvert eitt einasta sveitarfélag í öllu Reykjaneskjördæmi. Hagsmunir þeirra við þessa skiptingu hafa verið gersamlega fyrir borð bornir. Ég vil nota tækifærið til þess að vekja sérstaka athygli á þessu, vita svona vinnubrögð og óska beinna skýringa á því, hvað hafi ráðið, að svona fór um þessa skiptingu og hvað hafi ráðið því, að hagsmunir sveitarfélaganna í Reykjaneskjördæmi voru svo mjög fyrir borð bornir. Þá tekur nú ekki betra við, ef litið er á skýrsluna um úthlutun fjár úr Atvinnujöfnunarsjóði ríkisins. Langar mig í því tilefni að spyrja formann Atvinnujöfnunarsjóðs ríkisins, sem mun vera hæstv. fjmrh., nokkurra spurninga um þær reglur, sem þeir háu herrar, sem stjórna þeim sjóði, fara eftir við úthlutun á því fjármagni, sem fer úr þeim sjóði.
1. Eftir hvaða reglum er farið um lán og styrkveitingar, sé þær að finna, úr Atvinnujöfnunarsjóði ríkisins?
2. Banna reglur sjóðsins lánveitingar, t.d. til Reykjaneskjördæmis, eða hver er skýringin á því, að ár eftir ár hefur hlutfall hans í lánveitingum og styrkveitingum úr Atvinnujöfnunarsjóði verið í núlli, eða rétt þar fyrir ofan?
3. Hvað hefur Atvinnujöfnunarsjóður ríkisins veitt oft fjárhagsaðstoð s.l. 3 ár, t.d. til þess að gera kleift að kaupa skip úr Reykjaneskjördæmi til annarra landshluta?
Ég vona, að hæstv. fjmrh. sem formaður Atvinnujöfnunarsjóðs geti svarað þessum spurningum, þó að þær séu ekki skriflega fram settar.