18.05.1972
Neðri deild: 88. fundur, 92. löggjafarþing.
Sjá dálk 1881 í B-deild Alþingistíðinda. (1899)
255. mál, Húsnæðismálastofnun ríkisins
Pétur Sigurðsson:
Herra forseti. Ég get nú eiginlega ekki orða bundizt, þegar hv. síðasti ræðumaður hefur lokið máli sínu. Aumingja blessaður maðurinn, honum var svo mikið niðri fyrir út af eigin ágæti og ágæti síns ágæta flokks, sérstaklega þegar hann var að tala um hinn stóra og sterka Sjálfstfl. Að ég tali ekki um þessa eindæma yfirlýsingu, að Alþfl. hafi komið húsnæðismálum Íslendinga á þann grundvöll, sem þau byggja á í dag, og eiginlega byggt yfir íslenzku þjóðina. Ja, miklir menn erum við, Hrólfur minn. Ég geri ráð fyrir því, að það sé erindi þeirra nú í húsnæðismálastjórn með þeim undarlegu samningum, sem þeir hafa gert við félaga sína og hina stjórnarflokkana, erindið sé að halda áfram slíku verkefni, sem þeir þó hafa getað velt nokkuð á undan sér á undanförnum árum í samstarfi við hinn stóra og sterka, en þó ljóta úlf, sem þeir hafa verið að vinna með s. l. 12 ár. Það ætti þessi hv. þm. að vita, að á þessum 12 árum hafa stórvirki verið unnin í húsbyggingarmálum Íslendinga, það er auðvitað rétt hjá honum, og auðvitað væntum við þess, að svo verði áfram, en ég minnist þess ekki á þessum 12 árum, sem Sjálfstfl. hefur verið í stjórnarsamvinnu við Alþfl., að það hafi ekki legið fyrir að hausti, eða a. m. k. áður en kom að afgreiðslu fjárlaga, nema máske tvisvar sinnum á þessum 12 árum, hvernig ætti að fjármagna það, sem gera ætti á komandi ári. Nú liggur hins vegar fyrir, að það vantar allt að 600 millj. kr. til þess að standa undir loforðum og lagalegum skuldbindingum. Hvort hv. síðasti ræðumaður telur sig þess umkominn með því að komast inn í húsnæðismálastjórn eða einhver félaga hans að ná þessum 600 millj. kr. til þess að Íslendingar geti haldið áfram að byggja eins og Alþfl. hefur byggt yfir þá á undanförnum 12 árum, það veit ég ekki. Ég skil ekki enn þá, hvernig þeir ætla að fara að þessu. Er ekki farinn að sjá það.
Ég spurði hæstv. félmrh. að því hér við 2. umr. málsins, hvað liði samningum þeim, sem hann boðaði og óskaði eftir, að teknir væru upp við lífeyrissjóðina hér í landi. Hefur hann fengið svar frá þeim? Er komið loforð frá þeim um að fjármagna einhvern hluta af þessari miklu þörf? Ég veit um tvo eða þrjá sjóði, sem hafa gefið honum loforð, en það eru samt sem áður ekki þeir sjóðir, sem kannske standa honum næst og hann ætti frekast að geta haft aðgang að. Og mér er ekki heldur kunnugt um, að það sé neinn sjóður, sem Alþfl. ráði yfir sérstaklega. Ég veit ekki um neina sérstaka sjóði, sem Alþýðubrauðgerðin í Reykjavík eigi og hún geti lánað inn í húsbyggingarmálin hér í Reykjavík. Það er alveg öruggt.
Það er talað um, að við séum með málþóf um þetta mál. Við teljum þetta þýðingarmikið mál. Hv. síðasti ræðumaður minntist á, að við teldumst vera sammála tveimur atriðum í þessu frv. Við höfum marglýst því yfir, að við séum það. Annað atriðið er algerlega óþarft að bera fram í formi lagafrv. Það er þegar viðurkennt. Og jafnvel þessi ágæti þm. Alþfl. getur ekki annað en viðurkennt það, vegna þess að þessar greiðslur eru allar þegar fallnar í gjalddaga, og það þarf enginn, hvorki okkar þm. né því miður þeirra, sem þegar hafa greitt það, að hafa áhyggjur af því fyrr en á næsta ári. Það væri þannig eins vel hægt að ígrunda það mál betur, eins og ég tók fram í minni fyrri ræðu, hvort ekki væri hægt að finna betri lausn en þarna hefur komið fram, eins og hv. þm. Ólafur Einarsson tók fram og benti á í grg. Þóris Bergssonar, sem nokkrum sinnum hefur verið notaður til þess að vitna í og senda grg. frá sér í sambandi við þetta sama mál, en nú má jafnvel ekki hlusta á. Það getur verið, að það komi á daginn, að ástæða sé til þess að hlusta á, hvað hann segir varðandi 20 millj. kr. viðbótina. Vissulega er þetta stórt spor að stíga, en ég er sannfærður um, að ekki þarf neina lagabreytingu til þess. Ef hæstv. félmrh. og hæstv. ríkisstj. með aðstoð Alþfl. hefur svo mikil fjárráð að þeir geta haldið áfram að byggja yfir þjóðina eins og hefur verið gert s. l. 12 ár, þá geta þeir, ef þeir hafa alla þessa peninga í vasanum, bara komið með þetta inn undir þessum lið. Staðreyndin er sú, að það eru ekki þessi tvö atriði, sem verið er að leitast við að ná fram hér á Alþ. Það er verið að ná þessu fram, þessu samkomulagi þessara tveggja systraflokka jafnaðarmannaflokks nr. 1 og jafnaðarmannaflokks nr. 2, eins og þeir heita í dag, eða fyrsti samruni vinstri flokka hér á Íslandi. Ja, en sá samruni.
Herra forseti. Það hefur komið fram nú þegar, að menn eru orðnir þreyttir á því að ræða þetta mál, og mér heyrist á sjálfum stjórnarliðum, að þeir vilji helzt ekki hafa fleiri orð um það. Ég held líka, að í því sambandi hafi komið fram efnisleg gagnrýni frá okkur sjálfstæðismönnum á frv. og einstökum greinum þess. Það sést á undirtektum hv. þm., að þm. stjórnarflokkanna skammast sín fyrir frv. Sjálfsagt veit ég það, að þegar upp verður staðið, mun síðasti ræðumaður skammast sín hvað mest fyrir sinn þátt í því samkomulagi, sem hér á að fara að lögfesta, sem — ég vil enn endurtaka, eins og ég hef þegar sagt — er kannske skýrasta dæmið í stjórnmálalífi okkar um pólitískt siðleysi.