11.04.1973
Efri deild: 89. fundur, 93. löggjafarþing.
Sjá dálk 3347 í B-deild Alþingistíðinda. (2846)
221. mál, aðstoð ríkisins við kaupstaði og kauptún vegna landakaupa
Félmrh. (Hannibal Valdimarsson):
Herra forseti. Þetta frv. er einnig komið frá hv. Nd. og hlaut þar einnig ágreiningslausa afgreiðslu. Hér er eingöngu um það að ræða, að ríkissjóður skuli árlega leggja fram 10 millj. kr. á 10 ára bilinu frá 1974 til og með 1983, sem ríkisstj. er svo heimilað að lána kaupstöðum og kauptúnum til þess að kaupa lönd og lóðir innan takmarka hlutaðeigandi sveitarfélags. Þetta er framlenging á l. frá 1963, þar sem heimilað var að greiða úr ríkissjóði árlega sem framlag til sveitarfélaganna 3 millj. kr. á ári á tímabilinu frá 1963—-1972. Þessi tímabundna löggjöf er nú fallin úr gildi, og er nú lagt til, að hún verði framlengd með þessu frv. næsta 10 ára tímabil. Og upphæðin, sem miðað við verðgildi 3 millj., þegar lögin 1963 voru sett, er nú 10 millj. og því er lagt til, að upphæðin breytist úr 3 millj. í 10 millj. kr. Má þá heita, að í raun og veru sé sams konar aðstoð veitt nú til landakaupa sveitarfélaga, kauptúna og kaupstaða og í fyrri löggjöfinni.
Það liggja nú fyrir margar beiðnir í félmrn. um slíka aðstoð til landakaupa og er skrá yfir þær umsóknir í grg. frv. og þörfin á slíkri aðstoð óumdeilanlega ekki minni, en hún hefur verið áður. Veitt hefur verið allt að 60% af kostnaðarverði hins keypta lands sem framlag frá ríkissjóði, og er rætt um, að þau ákvæði haldist. Samtals voru á þessum áratug, sem löggjöfin gilti, veittar 34.821.288 kr. til slíkrar aðstoðar, sem í frv. greinir.
Það þarf engin fleiri orð um þetta að hafa. Hér er sem sé till. um, að sams konar aðstoð verði veitt kaupstöðum og kauptúnum til þess að kaupa lönd og lóðir og fólst í löggjöfinni frá 1983.
Ég legg til, herra forseti, að frv. verði að umr. lokinni vísað til 2. umr. og hv. félmn.