04.03.1975
Sameinað þing: 45. fundur, 96. löggjafarþing.
Sjá dálk 2090 í B-deild Alþingistíðinda. (1654)
105. mál, Húsnæðismálastofnun ríkisins
Fyrirspyrjandi (Þorv. Garðar Kristjánsson) :
Herra forseti. Ég hef leyft mér að bera fram fsp. á þskj. 120 til félmrh. Spurt er um, hvað líði meðferð frv. til l. um breyt á l. um Húsnæðismálastofnun ríkisins, um íbúðarlán til eflingar byggðajafnvægis o. fl., sem Ed. Alþ. samþykkti 6. maí 1974 að vísa til ríkisstj. Þetta frv. gerir ráð fyrir að í lögum um Húsnæðismálastofnun ríkisins komi nýr kafli er fjalli um íbúðarlán til eflingar byggðajafnvægi. Þar segir, að ríkisstj. geti ákveðið eftir beiðni viðkomandi sveitarstjórna sérstaka fyrirgreiðslu við húsbyggjendur í þeim héruðum landsins sem aðstoðar er þörf til eflingar byggðajafnvægi í landinu.
Frv. þetta ákveður svo um form þeirrar aðstoðar sem veita skal, að ákvörðun um aðstoð eigi að gilda fyrir 4 ár í senn. Gert er ráð fyrir ákveðnu framkvæmdatímabili, hliðstætt því sem lög mæla nú fyrir um aðstoð úr Byggingarsjóði verkamanna, til að koma við skipulegum vinnubrögðum og áætlunargerð um að ná settum áfanga í húsbyggingum. Á þessu tímabili skal veita í viðkomandi sveitarfélag sams konar lán og veitt eru nú úr Byggingarsjóði ríkisins til íbúða, sem byggðar eru á vegum Framkvæmdanefndar byggingaráætlunar ríkisins í Breiðholti í Reykjavík. Þessi sérstöku íbúðarlán má veita öllum byggingaraðilum, bæði til byggingar eigin íbúða og leiguíbúða, hvort sem það eru einstaklingar, byggingarfélög eða viðkomandi sveitarfélög sjálf sem byggja.
Hin sérstaka aðstoð er fólgin í því, að lán þessi eru að upphæð 80% af byggingarkostnaði íbúða og eru til 33 ára, afborgunarlaus fyrstu 3 árin, en endurgreiðast síðan á 30 árum. Hér er um að ræða miklum mun betri lán en hin almennu lán Byggingarsjóðs ríkisins, Þau lán eru nú ákveðin 1 millj. 60 þús. kr. á hverja íbúð, en nema naumast eða í mesta lagi um 20% af byggingarkostnaði meðalstórrar íbúðar og eru einungis til 25 ára með engum afborgunarfresti.
Til að mæta fjármagnsþörf Byggingarsjóðs ríkisins vegna þessara íbúðarlána til eflingar byggðajafnvægi er í frv. lögð sú skylda á Byggðasjóð að kaupa skuldabréf, sem veðdeild Landsbanka Íslands er heimilt að gefa út til öflunar fjár í Byggingarsjóð ríkisins. Ég tel, að ráðstöfunarfé Byggðasjóðs verði ekki betur varið, miðað við tilgang sjóðsins, en að standa undir því sem sérstaklega er gert í húsnæðismálunum til eflingar byggðajafnvægi í landinu.
Þá felur þetta frv. í sér ákvæði um verðtryggingu þeirra íbúða, sem hin sérstöku lán til eflingar byggðajafnvægi eru veitt út á. Í frv. er að finna ákvæði varðandi þessa verðtryggingu.
Ákvæðin um þessi lán til eflingar byggðajafnvægi eru höfuðatriði þessa frv. Í frv. voru tvö önnur atriði, sem líka eru mikilvæg, en um annað efní. Annað varðar Byggingasjóð verkamanna. Þar er lagt til að breytt verði hlutfallinu milli framlags ríkisins og sveitarfélaga til Byggingarsjóðs verkamanna, sem hefur verið allt frá stofnun Byggingarsjóðs verkamanna þannig að ríkið hefur greitt helming framlags á móti helmingi frá sveitarfélögunum. Í frv. er lagt til, að þetta hlutfall breytist þannig að ríkið greiði 3/4 á móti 1/4. Loks var svo það ákvæði í þessu frv. að hin almennu lán Byggingarsjóðs ríkisins hækkuðu úr 800 þús. kr., sem þá var, í 1200 þús. kr. Þessar tölur eru orðnar úreltar núna og hin almennu lán Byggingarsjóðs ríkisins standa í 1 millj. og 60 þús. kr., eins og ég sagði áðan, en ættu miðað við þann grundvöll, sem miðað var við í frv. mínu, að vera núna um 2 millj. kr.
Ég rek þetta ekki frekar, en tel að hér sé um svo þýðingarmikið mál að ræða, að það sé mjög áríðandi að ríkisstj, aðhafist eitthvað í þessum efnum, og því er fsp. mín fram borin.