11.03.1975
Sameinað þing: 49. fundur, 96. löggjafarþing.
Sjá dálk 2254 í B-deild Alþingistíðinda. (1804)
311. mál, lagning byggðalínu til Norðurlands
Ingi Tryggvason:
Herra forseti. Það kann að vera svo að þeim hv. alþm., sem búa í héruðum þar sem eru gnægðir raforku, fari nokkuð að leiðast þráfellt spjall okkar sumra hinna um orkuskortinn. En ástæðan til þess að ég kem hér upp nú er fyrst og fremst sú, að ég vil vekja athygli á því sem er að gerast í orkumálum á Norðurlandi. e. Það lítur út fyrir samkv. þeim upplýsingum sem við höfum fengið frá hæstv. iðnrh., að við munum fá hvort tveggja sem næst í senn, byggðalínu norður og virkjun í Kröflu. Víst er þetta gott og ágætt, en það sýnir líka í hvert óefni var komið og hversu mikil nauðsyn var að úr yrði bætt.
Ég vil leyfa mér að vekja athygli á því að við hv. þm. Páll Pétursson fluttum till. til þál. um lagningu byggðalínu fyrir árslok 1975. Þessi till. er í n. Mig langar að endurtaka í örfáum orðum helstu rökin fyrir því að slík till. sem þessi var flutt. Þau eru einfaldlega að nú er eytt stórfé í dísilolíu til að fullnægja brýnustu raforkuþörf norðlendinga og þó hvergi nærri fullnægt þeirri þörf sem þyrfti. Er gert ráð fyrir að á árinu 1976 verði eytt um eða yfir 300 millj. kr. í dísilolíuna eina til þess að fullnægja brýnustu orkuþörf á Norðurlandi eða sem svarar þriðjungi til fjórða parti af því sem byggðalína norður kostar. Þess vegna var það að við hv. þm. Páll Pétursson fluttum fyrrnefnda þáltill. þar sem var gert ráð fyrir að ríkisstj. ynni að því eftir fremsta megni að lokið yrði lagningu byggðalínunnar á þessu ári. Ég veit að á því eru viss vandkvæði. Það kann að vera að þau séu yfirstíganleg, en þó efast ég um það. Og ég vil vekja athygli á því að fyrir 300 millj. í sparaðri aðkeyptri dísilolíu er vissulega hægt að gera nokkuð og á sig leggjandi til þess að losna við slík orkukaup erlendis frá.