18.03.1975
Sameinað þing: 52. fundur, 96. löggjafarþing.
Sjá dálk 2432 í B-deild Alþingistíðinda. (1919)
327. mál, vetrarvegur um Breiðdalsheiði og tenging Djúpvegar við þjóðvegakerfi landsins
Karvel Pálmason:
Herra forseti. Ég þakka hæstv. ráðh. fyrir hans svör, en ég vil aðeins fara um þau örfáum orðum.
Mér sýnist, að því er varðar Breiðadalsheiðina, að þar hafi einhver afturkippur komið í ráðandi menn sem um þessi mál fjalla, því að eins og ég gat um áður þá veit ég ekki betur en það hafi verið ákveðið af Hannibal Valdimarssyni, þegar hann gegndi embætti samgrh., að farið yrði í það eftir að Oddsskarðsframkvæmdunum lyki að ganga úr skugga um a. m. k. hvort ekki væri tiltölulega framkvæmanlegt að gera jarðgöng á þessu svæði.
Það kom fram í svari hæstv. ráðh. að það er velt fyrir sér þremur möguleikum. Það er í fyrsta lagi að grafa skarð á þessu svæði og síðan byggja þak yfir, í öðru lagi vegsvalir og í þriðja lagi jarðgöng. Ef þetta er upptalning í réttu hlutfalli við það að menn hafi forgangsröð á verkefnunum, þá verð ég fyrir mitt leyti að lýsa því yfir að ég er óánægður með að ráðgjafar á Vegamálaskrifstofunni setji jarðgangaframkvæmdina nr. 3. Ég er þess fullviss að jarðgöng eru sú eina framkvæmd sem tryggir í reynd að akvegasamband verði á þessu svæði árið um kring. Ég hygg því að fyrst og fremst eigi að snúa sér að því að ganga úr skugga um það hversu dýrt fyrirtæki þarna væri um að ræða. Ég er ekki í neinum vafa um að það er framkvæmanlegt, enda heyrði ég ekki betur á svari hæstv. ráðh. en að það kæmi þar einnig fram. Spurningin er aðeins hversu dýrt mannvirki hér væri um að ræða.
Ég lýsi óánægju minni yfir því, að ég lít svo á að hér hafi verið stungið við fótum frá því sem áður hafði verið ákveðið, fyrir 2 árum, og ég vænti þess að hæstv. ráðh. taki af skarið um það mjög fljótlega að í þetta verði ráðist.
Að því er varðar síðari hluta fsp. um tengingu Djúpvegar, þá er það rétt sem kom fram hjá hæstv. ráðh. að um það eru deildar meiningar hvaða leið eigi þarna að velja. Það er fyrst og fremst rætt um tvær leiðir, þ. e. Þorskafjarðarheiði og Kollafjarðarheiði. Ég hins vegar lýsi vonbrigðum mínum yfir því að niðurstöður af athugun Vegamálaskrifstofunnar skuli ekki geta legið fyrir við endurskoðun vegáætlunar sem á að fara fram nú innan tíðar. Það mun ætlað, eftir því sem hæstv. ráðh. upplýsti, að eftir þessu þurfi að bíða a. m. k. til ársins 1976. Ég tel að það sé búið að rannsaka þetta mál það lengi að það ættu að liggja fyrir um það nokkuð glöggar upplýsingar og niðurstöður rannsókna hvora þessara tveggja leiða, ef menn staðnæmast við það tvennt, ætti frekar að velja.
Ég skal ekki fara frekari orðum um þetta, en ég vænti þess að hæstv. ráðh. leggi það af mörkum, sem hann telur sér fært, til þess að hvort tveggja þessara framkvæmda geti orðið að veruleika hið allra fyrsta.