21.03.1977
Efri deild: 52. fundur, 98. löggjafarþing.
Sjá dálk 2666 í B-deild Alþingistíðinda. (2008)
101. mál, virkjun Hvítár í Borgarfirði
Stefán Jónsson:
Herra forseti. Ég hef raunar litlu við að bæta þá ítarlegu og ágætu ræðu sem hv. þm. Steingrímur Hermannsson flutti hér áðan. Það virðist vera hans dagur í dag, og ég vænti þess að hann láti það ekki bíða þangað til jafndægur á vori ber öðru sinni upp á mánudag að tala svo skynsamlega um íslensk orkumál eins og hann gerði áðan.
Eins og ég segi, þá get ég tekið undir í öllum meginatriðum það sem hann sagði um þingmál þetta og gert öll hans meginrök að mínum. Ég hlýt eins og hann að taka það mikið mark á Orkustofnun sem umsagnaraðila um þetta mál að ég felli mig ekki við það að Alþ. veiti heimild til virkjunar við Kljáfoss á grundvelli gagna sem Orkustofnun telur lítið sem ekki mark á takandi og vera unnin með þeim hætti að Alþ. væri vansæmd að því að taka mark á þeim. Við höfum fyrir skemmstu reynt það, alþm., hvað það getur í raun og veru kostað að veita heimildir til virkjana ótímabundnar, eigandi það á hættu að forsendur breytist þannig að notkun þeirra heimilda af hálfu ríkisstj. getur raunverulega undir vissum kringumstæðum brotið í bága við þjóðarhag.
Ég geri ráð fyrir að ein af ástæðunum fyrir því, að hæstv. ríkisstj. veitti upp úr þurru og skyndilega samþykki sitt við því að notuð yrði heimildin sem Alþ. veitti til virkjunar Hrauneyjafoss, hafi verið sú, að hæstv. ríkisstj. hafi ekki kært sig um að Alþ. fjallaði um þetta mál. A. m. k. var Alþ. sniðgengið í því tilfelli.
Ég tek undir það, sem hv. þm. Steingrímur Hermannsson sagði um afstöðu okkar til fyrirhugaðrar Kljáfossvirkjunar. Ég er eins og hann alls ekki þeirrar skoðunar að þar komi ekki virkjun til greina. En ég vil að málið verði athugað betur og niðurstaða þeirrar hlutlægu athugunar um hagkvæmni þessarar virkjunar látin ráða um framkvæmd þessarar virkjunar. Síðan vil ég að kannað verði hversu virkjun þessi fellur að heildaráætlunum um uppbyggingu orkuveitukerfis landsins.