18.04.1977
Neðri deild: 66. fundur, 98. löggjafarþing.
Sjá dálk 3295 í B-deild Alþingistíðinda. (2319)
129. mál, járnblendiverksmiðja í Hvalfirði
Gunnlaugur Finnsson:
Herra forseti. Það er aðeins örstutt aths. sem mig langaði til og þótti raunar nauðsynlegt að gera við það sem kom fram í ræðu hv. síðasta ræðumanns, 3. þm. Reykv. Hann sagði að Framsfl. hefði snúið algjörlega frá þeirri stefnumörkun sem vinstri stjórnin markaði og hann túlkaði með upplestri úr þingtíðindum. Þessu vil ég mótmæla. Ég veit ekki annað en að það hafi verið gott samkomulag á milli stjórnarflokkanna um að halda þessari stefnu fram, sem kemur fram í því að orkumálin, eins og margsinnis hefur verið sagt, hafa haft algjöran forgang. Það kemur fram í þeim hitaveituframkvæmdum, sem átt hafa sér stað um allt land, aukinni og árangursríkri leit að heitu vatni, áframhaldi á þeim virkjunum, sem þá voru ákveðnar, og tengilínu á milli orkuvera á Suðurlandi og Norðurlandi, sem kemur í gagnið eigi löngu síðar en Sigölduvirkjun tekur til starfa. Hitt er svo annað mál, sem ég drap á áðan, að verkefnið að koma orku til húshitunar um allt landið er milljarðafyrirtæki sem við ráðum ekki við á skömmum tíma, og hvarflar ekki að mér að við getum unnið slíkt verkefni á einu ári eða tveimur. Ég vil skýra það í leiðinni, að þegar ég talaði um það í ræðu minni áðan að við byggjum ekki við samræmda orkustefnu, þá á ég fyrst og fremst við það, að við búum í dag við það skipulag hér í landinu að við höfum stórt fyrirtæki, sem heitir Landsvirkjun, helmingafyrirtæki ríkisins og Reykjavíkurborgar, hér starfa Rafmagnsveitur ríkisins og fjöldamargar bæjar- eða sveitarfélagaveitur, og það er óljóst enn þá hver stefna verður mörkuð um samtengingu, samrekstur eða samvinnu þessara fjölmörgu aðila. En það vita eflaust líka allir þm., að það er unnið í dag af ákveðinni n. að stefnumörkun í þessu máli. Þetta er mál sem ég tel vera mjög aðkallandi að leysa, og á meðan það er ekki leyst, þá búum við sem sagt ekki við ákveðna markaða stefnu hvernig við komum fyrir stjórnunarþætti orkumálanna í framtíðinni.