20.04.1977
Neðri deild: 68. fundur, 98. löggjafarþing.
Sjá dálk 3431 í B-deild Alþingistíðinda. (2416)
102. mál, tilkynningarskylda íslenskra skipa
Frsm. (Sverrir Hermannsson):
Virðulegi forseti. Sjútvn. hefur haft til meðferðar frv. til l. um tilkynningarskyldu íslenskra skipa, flutt af hv. 8. þm. Reykv., Pétri Sigurðssyni. Það þykir bera nauðsyn til að festa ákvæðin um tilkynningarskyldu skipa í lögum, en áður hefur gilt um þetta reglugerð sett af fyrrv. sjútvrh., Eggert G. Þorsteinssyni, 24. maí 1968. Áður en það varð hafði hv. flm. þessa frv. borið fram þáltill. í Alþ. um málið, og vegna þess þrýstings, sem á sínum tíma skapaðist vegna mikilla sjóslysa, varið sú reglugerð sett.
Sjútvn. Nd. mælir einróma með samþykkt þessarar till. Hún hefur sent málið til umsagnar allmargra aðila: Landhelgisgæslu, Rannsóknarnefndar sjóslysa, Sjómannasambands Íslands, Farmanna- og fiskimannasambandsins, Landssambands ísl. útvegsmanna og Slysavarnafélags Íslands, og allir hafa þessir aðilar tjáð samþykki sitt við að þetta yrði fest í lög.
Það má segja, að fyrstu sex greinar frv. séu nokkurn veginn samhljóða því sem núverandi reglugerð segir til um, en aftur á móti er svo frá 7. gr. og til og með 13. gr. vegna lagasetningarinnar sjálfrar. Í 7. gr. er staðfest skylda Landssíma Íslands til fullkominnar þjónustu á þessu sviði. Í 8. gr. er staðfestur hinn stjórnskipulegi réttur Slysavarnafélagsins. Síðan er aftur í 9. gr. lögbundið ákveðið gjald til Landssíma Íslands, sem nú þegar hefur verið ákveðið, og síðan áfram í 10. gr. ákvæði um sektarákvaði. En ég vil geta þess, að þar sem tekið er fram í 12. gr. að sjútvrh. ákveði með reglugerð greiðslu útgerðarinnar til Landssíma Íslands og nánari framkvæmd þessara laga, þá á þetta einnig við um 10. gr., ákvæði um sektarfjárhæðir.
Það er sem sagt einróma álit sjútvn. að leggja til að frv. verði samþ. óbreytt.