03.05.1977
Efri deild: 87. fundur, 98. löggjafarþing.
Sjá dálk 4275 í B-deild Alþingistíðinda. (3327)
168. mál, samvinnufélög
Frsm. (Helgi F. Seljan):
Herra forseti. Félmn. hefur haft til meðferðar frv. til breyt. á l. um samvinnufélög sem er komið frá Nd. og var þar samþykkt einróma óbreytt.
Frv. felur í sér í fyrsta lagi það atriði að opna samvinnulögin fyrir framleiðslusamvinnufélögum í ákveðinni starfsgrein. Þar er þó aðeins um heimild að ræða og má setja skilyrði að þau séu aðeins opin félögum úr ákveðinni starfsgrein. Í öðru lagi er það efni frv., að kjörgengi starfsmanna samvinnufélaganna sé lögfest séu þeir þar félagsmenn, og er það svo sjálfsagt í samræmi við breytta tíma að ekki þarf um að ræða. Í þriðja lagi er ákvæði um launagreiðslur, þ. e. a. s. að félög af þessu tagi geti ekki undirboðið vegna lægri launa til starfsmanna en gildandi samningar segja um, og bent á það um leið, að þessi félög skuli hafa nána samvinnu við viðkomandi verkalýðsfélög vegna kaupgjaldsmála og vinna að sameiginlegum hagsmunum verkafólks. 4. gr. er svo um það, að framleiðslusamvinnufélögin falli inn í skilgreiningu um samvinnufélög.
Þess má geta, að Samband ísl. samvinnufélaga fékk þetta frv. til umsagnar og mælti eindregið með samþykkt þess. Sama hefur orðið uppi á teningnum hjá félmn. Hún mælir einróma með samþykkt frv. óbreytts.
