08.02.1978
Efri deild: 56. fundur, 99. löggjafarþing.
Sjá dálk 2043 í B-deild Alþingistíðinda. (1662)

167. mál, Fiskimálaráð

Sjútvrh. (Matthías Bjarnason):

Herra forseti. Í lögum um Fiskimálaráð segir, að Fiskimálaráð skuli vera ráðgefandi um mótun heildarstefnu í uppbyggingu sjávarútvegsins og markaðsmálum og skal það beita sér fyrir góðri samvinnu allra aðila, sem hlut eiga að máli, með gagnasöfnun, umræðufundum, skýrslugerð, útgáfu- og fræðslustarfsemi og öðrum ráðum sem líklegust eru talin til þess hverju sinni að tilgangi með stofnun ráðsins verði náð. Jafnframt segir að ályktanir sínar um uppbyggingu fiskiskipastólsins skuli Fiskimálaráð við það miða, að jafnan sé sem mest fjölbreytni í útgerðinni og eðlilegt jafnvægi milli einstakra greina hennar.

Þessi lög voru samþykkt á Alþ. 1968, og var, eins og ég las upp, tilgangurinn að móta heildarstefnu. En fljótlega eftir að þetta ráð hafði tekið til starfa mætti stofnun þess nokkurri andstöðu. Einkum þótti hlutverk ráðsins of skylt hlutverki Fiskifélags Íslands, auk þess sem ýmsum þótti sem verið væri að fela Fiskimálaráði verkefni sem betur ættu heima í rn. Það varð því úr, að framkvæmdanefnd Fiskimálaráðs ritaði sjútvrn, í marsmánuði 1970 bréf þess efnis, að gerð yrði könnun á heildarstjórn sjávarútvegsmála hérlendis, og í framhaldi af því skipaði sjútvrh. þriggja manna n. sem skilaði nál. í nóv. 1971. Í nál, var lagt til að Fiskimálaráð yrði sameinað Fiskifélagi Íslands og skipulagi Fiskifélagsins yrði breytt á þann veg, að hagsmunasamtök, er áður áttu aðild að Fiskimálaráði, fengju eftir breytinguna aðild að Fiskifélagi Íslands.

Að baki þessari till. um sameiningu Fiskifélags og Fiskimálaráðs lá hugmynd um gleggri verkaskiptingu sjútvrn. og Fiskifélagsins og grundvallarmunur yrði gerður á þessum tveimur stofnunum með tilliti til ábyrgðar og með hliðsjón af hagkvæmni við einföldun á stjórnkerfi í sjávarútvegi almennt. Þessi grundvallarbreyting var svo gerð á lögum Fiskifélags Íslands í des. 1972, en þá fengu áhuga- og hagsmunasamtök í sjávarútvegi beina aðild að Fiskiþingi og Fiskifélagsstjórn, þannig að úr því varð Fiskifélagið fyllilega málsvari ekki aðeins fiskideilda og fjórðungssambanda, heldur og annarra hagsmunasamtaka sjávarútvegsins. Einnig var gerð skipulagsbreyting varðandi starfsemi félagsins og deildaskiptingu. Hið fyrsta Fiskiþing samkv. hinu nýja skipulagi kom svo saman í nóv. 1973. Eftir þessa breytingu minnkuðu umsvif Fiskimálaráðs mjög verulega, en það kom því þó ás að þessi breyting var gerð á lögum Fiskifélags Íslands.

Eftir að þessar breytingar hafa verið gerðar sé ég ekki ástæðu til þess að Fiskimálaráð starfi áfram sjálfstætt, eins og verið hefur, vegna minnkandi umsvifa, Kostnaður af starfsemi ráðsins hefur verið greiddur úr Fiskimálasjóði sem hefur verið minnkandi á síðustu árum. Og þrátt fyrir það að ég var á sínum tíma 1. flm, þessa máls, þá taldi ég þessu máli best komið undir einni stofnun, þar sem allir hagsmunaaðilar í sjávarútvegi ættu sæti og auk þess fulltrúar hinna stærstu stofnlánasjóða sjávarútvegsins til þess að móta þar heildarstefnu. En það samkomulag náðist aldrei, og hefði verið margt betra nú í þessum greinum, ef menn hefðu borið gæfu til að móta þar allir sameiginlega heildarstefnu. En úr því varð ekki. Eftir þessa breytingu á Fiskifélagi Íslands tel ég ekki ástæðu til þess að halda starfsemi Fiskimálaráðs áfram, og þetta frv. fjallar um það að lög um Fiskimálaráð verði felld úr gildi.

Ég legg svo til, að að lokinni þessari umr. verði málinu vísað til sjútvn.