08.03.1978
Neðri deild: 65. fundur, 99. löggjafarþing.
Sjá dálk 2823 í B-deild Alþingistíðinda. (2070)
206. mál, Lífeyrissjóður barnakennara
Benedikt Gröndal:
Virðulegi forseti. Þetta mál og tvö síðustu mál, sem d. fjallaði um á þessum fundi, eru um lífeyrissjóði og breyta einni grein í lögum um hvern þriggja sjóða á þann hátt sem hér hefur verið útskýrt og ég er fylgjandi. En með því að gera þessi þrjú frv. að lögum, sem mér sýnist að væri mjög ráðlegt, hefur Alþ. afgreitt ný lög með afdráttarlausu ákvæði um að stjórnir sjóðanna sjái um ávöxtun þeirra, m. ö. o. ráði því, hvernig sjóðunum er ráðstafað.
Nú eru í gildi lög frá því fyrir áramót, sem hæstv. ríkisstj. fékk afgreidd fyrir jólaleyfi, og í þeim lögum tók ríkisstj. sér vald með því að skylda lífeyrissjóði til að láta a. m. k. 40% af ráðstöfunarfé sínu til að kaupa skuldabréf af hinu opinbera. Þar með var takmarkað stórkostlega vald sjóðsstjórnanna til að ráðstafa fé þeirra.
Nú hygg ég, að ef lög rekast á, þá gildi þau, sem nýrri eru. Ef Alþ. samþykkir þrenn lög, sem ítreka, að stjórnir sjóðanna ráði útlánum og ávöxtun á fé þeirra, er þá ekki ákvæðið í lögunum frá því fyrir jól fallið um sjálft sig, a. m. k. hvað þessa lífeyrissjóði snertir?
Mér finnst það líta dálítið sérkennilega út að samþykkja þrenn lög um veigamikla lífeyrissjóði og undirstrika með skýrum setningum í öllum lögunum. að stjórnir þessara sjóða skuli sjá um ávöxtun á fé þeirra. Eru þar engin skilyrði um, að hún skuli gera það með því að lána féð ákveðnum aðilum, þó að það séu að sjálfsögðu reglur um, hvernig og í hvers konar skuldabréfum o. s. frv. lánin skuli fara fram. Ég vil því varpa fram, hvort Alþ. getur gert þetta tvennt með svo stuttu millibili án þess að á þessi þrenn lög beri að líta sem gildandi lög, þar sem þau stangast á við þá takmörkun á rétti sjóðsstjórnanna til að ávaxta fé þeirra sem lögfest var á s. l. ári.