14.03.1978
Sameinað þing: 56. fundur, 99. löggjafarþing.
Sjá dálk 2876 í B-deild Alþingistíðinda. (2107)
326. mál, orkumál á Austurlandi
Fyrirspyrjandi (Helgi F. Seljan):
Herra forseti. Ég þakka hæstv. iðnrh. svör hans. Það kom glöggt í ljós í máli hans, að engin bein ákvörðun um þessa virkjun hefur verið tekin eða jafnvel að það megi ekki vænta hennar á næstunni. Það verður aðeins unnið að fullnaðarhönnun, svo sem gert er ráð fyrir í þeirri skýrslu eða umsögn Rafmagnsveitna ríkisins sem ég áðan minnti á, og það þýðir það, að mér skilst, að það eigi þá að vera tryggt að þessar 65 millj., sem til þess þarf, fáist til þess að ljúka fullnaðarhönnuninni.
Ég verð að segja það, að þó að það liggi fyrir að áfram verði unnið þannig, þá munu Austfirðingar verða mjög óhressir yfir því, að ekkert annað skuli fram koma í svörum hæstv. ráðh. sem hönd á festir. Við því er ekkert að segja. Það er sem sagt greinilegt, að að þessu máli verður aðeins þannig unnið, að hægt verði að segja að fullnaðarhönnun sé lokið, en ákvörðun um það, að þarna skuli virkjað, og framhald málsins í heild er allt jafnóljóst og áður. Það er fullljóst, og það er það sem skiptir auðvitað mestu máli fyrir okkur Austfirðinga að vita.
Ég hygg að menn muni undra þetta mjög. Ég tók eftir því einmitt í áðurnefndri Austragrein, að þar var minnt sérstaklega á loforð hæstv. ráðh. á fundi þar eystra fyrir nær ári, að þar hefði hæstv. ráðh. gefið loforð um að ákvörðun yrði tekin 1977, þ. e. s. l. haust. Hvort hér er rétt eftir haft, veit ég ekki, þar sem ég var ekki á þessum fundi, en þetta var sem sagt fullyrt í blaði samstarfsmanna hæstv. ráðh. í ríkisstj. Og nú þegar ár er liðið frá þessu, eða nær ár liðið frá þessum fundi, þá er von að menn séu orðnir býsna langeygir eftir efndunum.
Niðurstaða Rafmagnsveitna ríkisins er sú, að nauðsynlegt sé að Bessastaðaárvirkjun geti hafið orkuframleiðslu eigi síðar en á árinu 1982. Þar er einnig gert ráð fyrir því, að strax á árinu 1983 yrði beinn hagnaður af þessu, miðað við dísilkeyrsluna, sem annars yrði, um 204 millj. kr. Síðan eru aftur settir fram hinir ýmsu valkostir og möguleikar og m. a. tekið inn í, hvaða möguleikar eru á flutningi Austurlínu til Austurlands eða til Austurlandsveitusvæðisins. Ég endurtek þess vegna, vegna þess að auðvitað skiptir það okkur mjög miklu nú, þegar ekki liggur fyrir ákvörðun um Bessastaðaárvirkjun, ekki liggur fyrir að ákvörðun um hana verði tekin í bráð: Hvernig verður þá að Austurlínunni staðið á þessu ári? Vandkvæði eru þar mikil nú og erfiðleikar og það er a. m. k. lágmark, að mér finnst, að Austfirðingar fái þá að vita núna frá hæstv. ráðh., ef hann getur svarað því á þessari stundu, hvort ekki sé tryggt að að þeim framkvæmdum verði þannig staðið að Austurlínan komist í gagnið.
Ég þakka hæstv. fyrir svör hans, þó ég verði að láta í ljós mikil vonbrigði mín með það, að aðalspurningunni, sem þarna var að hæstv. ráðh. beint, var í raun ekki svarað.