Skrifstofa Vestnorræna ráðsins
Skrifstofa Vestnorræna ráðsins hefur aðsetur á Alþingi og er framkvæmdastjóri ráðsins Lárus Valgarðsson, s. 563 0731, larus.valgardsson@althingi.is.
Gagnleg vefföng
Markmið, uppbygging og starfsemi
Lögþing Færeyja, landsþing Grænlands og Alþingi stofnuðu Vestnorræna þingmannaráðið í Nuuk á Grænlandi 24. september 1985 sem samstarfsvettvang þinganna þriggja. Með því var formfest samstarf landanna sem oft ganga undir nafninu Vestur-Norðurlönd (Vestnorden). Á aðalfundi ráðsins árið 1997 var nafninu breytt í Vestnorræna ráðið þegar samþykktur var nýr stofnsamningur. Þá voru einnig samþykktar nýjar vinnureglur og markmið samstarfsins skerpt.
Markmið ráðsins er að starfa að hagsmunum Vestur-Norðurlanda, gæta auðlinda og menningar Norður-Atlantshafssvæðisins, fylgja eftir samvinnu ríkisstjórna og landsstjórna Vestur-Norðurlanda, auka samstarfið innan norrænnar samvinnu og vera þingræðislegur tengiliður milli samvinnuaðila innan Vestur-Norðurlanda og annarra fjölþjóðlegra hagsmunahópa og ríkjasamtaka. Vestnorræna ráðið hefur ályktað um ýmis mál, þar á meðal umhverfis- og auðlindamál, aukið menningarsamstarf landanna og skóla- og íþróttasamvinnu, svo að fátt eitt sé nefnt. Ályktanir Vestnorræna ráðsins eru lagðar fram á Alþingi í formi þingsályktunartillagna.
Í Vestnorræna ráðinu sitja 18 þingmenn, sex frá hverju landi. Vestnorræna ráðið kemur saman til ársfundar sem jafnframt fer með æðsta ákvörðunarvald ráðsins. Þriggja manna forsætisnefnd, skipuð einum þingmanni frá hverju landi, stýrir starfi ráðsins á milli ársfunda. Ráðið getur einnig sett niður sérstakar vinnunefndir um einstök mál. Sem dæmi má nefna nefnd sem hafði yfirumsjón með Brattahlíðarverkefninu, samstarfsverkefni grænlensku landsstjórnarinnar og Vestnorræna ráðsins í tilefni af því að árið 2000 voru 1000 ár liðin frá því að Leifur heppni sigldi frá Brattahlíð og uppgötvaði Ameríku og rúm 1000 ár liðin frá byggingu Þjóðhildarkirkju, fyrstu kristnu kirkju í Ameríku. Vígsla Þjóðhildarkirkju og bæjar Eiríks rauða fór fram í Brattahlíð 15.-17. júlí 2000.
Í starfi sínu í Vestnorræna ráðinu leitast þingmenn við að ná markmiðum sínum með ályktunum og tilmælum til ríkisstjórna og landsstjórna, með virkri þátttöku í norrænu samstarfi, samstarfi við aðra aðila innan vestnorræns samstarfs, samvinnu við norðurskautsstofnanir og -samtök og skipulagningu á ráðstefnum og fundum.
