Heimsókn þingforseta Malaví
Catherine Gotani Hara, forseti þjóðþings Malaví, heimsótti Alþingi í dag ásamt föruneyti, skoðaði Alþingishúsið og átti fund með Steingrími J. Sigfússyni, forseta Alþingis, og hitti síðan utanríkismálanefnd að máli.
Forseti Alþingis færir forseta Malavíþings bókagjöf.
Catherine Gotani Hara varð fyrst kvenna til að hljóta kosningu sem forseti Malavíþings, en hún náði kjöri 19. júní síðastliðinn. Á fundi þingforsetanna var meðal annars fjallað um stöðu kvenna í stjórnmálum, stöðu og viðfangsefni þjóðþinga og áskoranir samtímans.
Steingrímur J. Sigfússon, forseti Alþingis, og Catherine Gotani Hara, forseti Malavíþings.
Á fundi malavíska þingforsetans með utanríkismálanefnd var meðal annars rætt um tvíhliða þróunarsamvinnu, en Malaví er annað samstarfslanda Íslands í þróunarsamvinnu í Afríku ásamt Úganda. Fjallað var um helstu þróunarsamvinnuverkefni sem Ísland hefur staðið að í Malaví og hinn góða árangur sem þau hafa skilað. Einnig var rætt um stöðu kvenna og valdeflingu þeirra.
Á fundi forseta Malavíþings með utanríkismálanefnd.
