Heimsþingi WPL lýkur í Hörpu
Undanfarna tvo daga hafa um 400 þingkonur og þjóðarleiðtogar fundað í Hörpu en ársþing alþjóðasamtakanna WPL, Women Political Leaders Global Forum, er haldið í samstarfi við Alþingi og ríkisstjórn Íslands. Er þetta fjölmennasta heimsþing sem samtökin hafa haldið. Samhliða var fundur CWWL, samtaka kvenþjóðarleiðtoga, haldinn í Alþingishúsinu.
Vigdís Finnbogadóttir, fyrrverandi forseti Íslands, er sérstakur verndari heimsþingsins og voru henni veitt sérstök heiðursverðlaun á þinginu.
Í gær sæmdi Vigdís Finnbogadóttir, fyrrverandi forseti Íslands, Katrínu Jakobsdóttur forsætisráðherra gullmerki CWWL, á þingi WPL í Hörpu. Við sama tækifæri var Katrínu veitt sérstök viðurkenning WPL.
Jafnframt komu tæplega áttatíu ungmenni á Alþingi í gær og sóttu viðburð á vegum Girl2Leader átaksins. Átakið #Girl2Leader hvetur ungar stúlkur til dáða og þátttöku á opinberum vettvangi.
Vigdís Finnbogadóttir, fyrrverandi forseti Íslands, sagði þeim frá sínum fyrstu skrefum í embætti og nokkrir erlendir kvenþingmenn ræddu jafnframt við þær um hvernig þær hófu feril sinn í stjórnmálum.
Á miðvikudag héldu samtök kvenþjóðarleiðtoga, sem Vigdís Finnbogadóttir stofnaði, fund í Alþingishúsinu.
Á sama tíma átti Steingrímur J. Sigfússon, starfandi forseti Alþingis, fund með yfir 20 erlendum þingforsetum.
Nánari upplýsingar um heimsþingið er að finna á vef WPL.
Ljósmyndir:©Bragi Þór Jósefsson, fyrir utan ljósmyndirnar af afhendingu viðurkenninga á þingi WPL í Hörpu.