skýrsla um breskan flugumann.
Forseti. Ég var að sjá á vefmiðlinum dv.is að skýrsla sú sem hæstv. innanríkisráðherra kallaði eftir frá ríkislögreglustjóra um breska njósnarann Mark Kennedy hefur verið gerð opinber en í þeirri skýrslu kemur nánast ekkert fram um það sem kallað var eftir, um hvort íslensk lögregluyfirvöld hafi vitað af starfsemi þessa flugumanns og njósnara sem beitti sér innan umhverfisverndarsamtaka árið 2005 og gerðist jafnframt brotlegur sem lögreglumaður með því að efna til líkamlegs sambands við eina af ungu stúlkunum sem voru þátttakendur í þessum mótmælabúðum.
Það hefur komið fram að bæði írsk og þýsk yfirvöld hafa viðurkennt að vita af þessum manni í þessu hlutverki, sama hlutverki og hann var í hér. Íslensk lögregluyfirvöld beita fyrir sig þeirri reglugerð eða samkomulagi sem þau hafa með starfsbræðrum sínum á Bretlandi að þau megi ekki gefa upp slíkar trúnaðarupplýsingar. Mig langar að spyrja hæstv. ráðherra hvort ekki sé tilefni til að þetta verði að utanríkismáli og að hann beini því til hæstv. utanríkisráðherra hvort ekki sé tilefni til þess að kalla sendiherra Breta á teppið og biðja um þessar upplýsingar sem íslensk lögregluyfirvöld mega ekki gefa upp.
Hæstv. forseti. Fyrir nokkrum mánuðum bárust fréttir af því að breskur lögreglumaður að nafni Mark Kennedy hefði komið sér fyrir innan raða evrópskra náttúruverndarsinna sem hafa látið til sín taka í margvíslegu andófi, m.a. hér á landi við Kárahnjúka á árinu 2005 og 2006. Þessi einstaklingur er jafnframt sakaður um lögbrot eins og hv. þingmaður nefnir hér sérstaklega, að stofna til líkamlegs sambands við einstaklinga í röðum þessa fólks sem er skýlaust brot á lögum og lögreglusamþykktum alls staðar í heimi sem vill kallast siðvæddur. Þetta er skýlaust brot.
Í ljósi þessa óskaði ég eftir upplýsingum frá ríkislögreglustjóra um hvort þessi maður hefði verið hér með vitneskju íslensku lögreglunnar eða að beiðni hennar. Nú hef ég fengið skýrslu frá ríkislögreglustjóra um þetta mál þar sem fram kemur að engar heimildir, engin gögn eða vitneskja sé fyrir hendi um að svo hafi verið. En það er rétt hjá hv. þingmanni að það er jafnframt sagt í skýrslunni að ekki sé hægt að útiloka að svo hafi verið, enda kemur jafnframt fram í skýrslunni að upplýsingar gengu á milli lögregluyfirvalda hér og erlendis um mótmælendur við Kárahnjúka þannig að það kemur fram í þessari skýrslu.
Ég hygg að þarna sé verið að segja (Forseti hringir.) og hef engar efasemdir um að þarna sé verið að segja satt og rétt frá, að það eru engar heimildir fyrir því að íslenska lögreglan hafi haft vitneskju um þennan mann (Forseti hringir.) en hitt er staðfest að upplýsingar gengu þarna á milli.
Forseti. Ég fæ í raun og veru ekki svar við því sem ég óskaði eftir að fá frá hæstv. ráðherra. Ef þetta er satt og rétt að íslensk lögregluyfirvöld höfðu ekki vitneskju um þennan flugumann og njósnara er þetta þá ekki orðið að utanríkismáli sem ber að hantera eftir þeim leiðum sem þarf að gera þegar um njósnara er að ræða sem er hér að njósna um íslenska borgara og íslensk umhverfisverndarsamtök og jafnframt reyna að leiða þessi samtök inn í miklu harðari aðgerðir en nokkur sem tók þátt í þessu vildi taka þátt í en það er ljóst að þessi maður reyndi það?
Hæstv. forseti. Flugumenn eru að störfum í lögreglunni, hinni evrópsku og alþjóðlegu lögreglu, t.d. í heimi eiturlyfjasölu og harðra glæpa. (Gripið fram í.) Ætlar hv. þingmaður að hlusta á það sem ég er að segja? Það er svo að flugumenn eru þar að störfum og fara á milli landa, það er staðreynd.
Ég lít svo á að verkefnið sé að setja skýrar reglur hér á landi og reisa skorður við því að flugumenn séu að störfum innan hreyfinga af pólitískum toga, þar á meðal þeim hreyfingum sem hér eiga við. Það þykir mér vera verkefnið, að Íslendingar búi svo um hnútana og við búum svo um hnútana að hér séu ekki á ferðinni í pólitískum andófshópum, (Gripið fram í.) hópum af lýðræðislegum toga. (Forseti hringir.) Það er verkefnið að búa svo um hnútana og fyrir því er ég að beita mér. (Gripið fram í.) Hvort eigi að gera þetta að utanríkispólitísku máli, ég tel svo ekki vera, (Forseti hringir.) ég ætla að svara þeirri spurningu alveg afdráttarlaust. En ég tel mikilvægt að við setjum lög og reglur sem standi vörð um (Forseti hringir.) lýðræðið og um andófið ef því er að skipta.
Forseti minnir hæstv. ráðherra sem og þingmenn að virða þann tíma sem þeir fá úthlutað í ræðustóli.