frumvarp um afnám gjaldeyrishafta.
Herra forseti. Ég neyðist til að nota örlítinn tíma til að leiðrétta rangfærslur sem hæstv. fjármálaráðherra fer hér með um að upptaka þrepaskipts skattkerfis hafi hækkað skatta á lægstu laun. Það er akkúrat öfugt. Með innleiðingu á lágtekjuþrepinu var unnt að hlífa lágtekjufólki algerlega við skattahækkunum sem aðrir urðu að bera og rúmlega það eins og rannsóknir sýna.
Ég ætla að inna hæstv. fjármála- og efnahagsráðherra eftir stöðu vinnunnar um afnám gjaldeyrishafta. Ég ætla ekki að elta hæstv. ráðherra uppi vegna margendurtekinna yfirlýsinga um að á næstu mánuðum eða næstu sex mánuðum verði tekin stór skref. Síðastliðna 18–24 mánuði hefur hæstv. fjármálaráðherra endurtekið verið með slíkar yfirlýsingar og mér telst til að slíkir sex mánuðir séu svona þrisvar sinnum liðnir. Þaðan af síður ætla ég að minna á yfirlýsingar hæstv. forsætisráðherra, sem hann gaf fyrir réttum tveimur árum síðan, um að í september 2013 mundi ný áætlun um afnám hafta líta dagsins ljós. Að undanförnu hefur verið talað ákveðið um að frumvarp um einhvers konar skatt sem hæstv. forsætisráðherra skírði stöðugleikaskatt á flokksþingi sínu sé að koma til þingsins og jafnvel fullyrt undir það síðasta að slíkt frumvarp eða frumvörp muni koma hingað í þessari viku. Þá ber svo við að svokölluð samráðsnefnd um afnám hafta hefur ekki verið kölluð saman í meira en mánuð. Það sem átti væntanlega að vera eiginlegt samráð um þetta risavaxna og þjóðhagslega mikilvæga verkefni hefur því dáið út og er ekki einu sinni orðin upplýsingamiðlun.
Ég spyr í fyrra lagi: Hverju á það að sæta ef fullbúið frumvarp er bara í höndum ríkisstjórnarinnar og á leiðinni til þingsins væntanlega í dag ef þessi vika á að standa eða allra næstu daga? Það er ekki seinna vænna því að í dag átti þingið að ljúka störfum. Að öðru leyti: Getur hæstv. fjármálaráðherra upplýst okkur nákvæmlega um stöðu málsins núna? Var frumvarp afgreitt í ríkisstjórn í morgun? Er það að koma til þingsins (Forseti hringir.) eða hver er staðan?
Herra forseti. Ég get ekki sleppt því að rifja upp fyrst hér er farið að tala um skattkerfisbreytingar fyrri ríkisstjórnar. Gleymum því ekki að verðtrygging persónuafsláttar var afnumin. Hefði það ekki verið gert væri einhver innstæða fyrir þessum orðum, en það var þannig að skattbyrði lægstu launa hækkaði vegna þess að persónuafslátturinn var aftengdur verðlagi þegar það rauk upp. Síðan var það þannig með milliskattþrepið að þegar við komum í ríkisstjórn þá var það í 240 þús. kr. Eru það millitekjur? Nei, það eru engar millitekjur. Það er engum blöðum um það að fletta að lág laun fengu á sig aukna skattbyrði. Við erum að vinda ofan af því núna.
Varðandi haftamálin skal ég segja að það er skaði af því hversu langan tíma þetta hefur tekið. Við lögðum upp með það að höftin yrðu í tvö ár þegar við komum þeim á haustið 2008. Því miður erum við ekki fyrir löngu komin fram með fullbúna áætlun um þessi mál. Skiptir vika til eða frá máli í sjálfu sér eða tveir, þrír mánuðir, jafnvel sex í samanburði við það að þetta takist vel þegar það gerist? (ÖS: Þú lýstir …) Það var talsvert til í því sem seðlabankastjóri sagði á sínum tíma, að við hefðum eitt skot til að skjóta með í þessu máli. Það skiptir auðvitað öllu máli þegar áætlunin kemur fram að hún sé vel ígrunduð og að aðgerðaáætlunin gangi eftir. Það finnst mér miklu mikilvægara. Um leið viðurkenni ég að ég vildi mjög gjarnan hafa komið með þetta mál fyrir talsvert löngu síðan, en þetta er mál sem hefur þurft að þroskast og það hefur tekið ákveðnum breytingum, meira að segja á undanförnum mánuðum, þessum síðustu þremur og sex sem vísað er til. Við höfum þurft að aðlaga okkur að veruleikanum og ráðgjöf okkar bestu ráðgjafa.
Varðandi samráðshópinn þá er rétt að hann hefði svo sem mátt koma oftar saman, en það gat aldrei orðið hinn tæknilegi úrlausnarvettvangur, jafnvel þótt ég hefði komið með allt það sem ég veit um þessi mál að því borði og setið yfir því með formönnum annarra flokka eða fulltrúum (Forseti hringir.) flokkanna þá hefðum við aldrei getað leyst það. Það var alltaf ljóst (Forseti hringir.) að þetta yrði fyrst og fremst vinna (Forseti hringir.) sérfræðinga. Ég hef reynt að koma upplýsingum á framfæri á þeim vettvangi (Forseti hringir.) og við munum að sjálfsögðu setjast saman með þeim hópi áður en málið kemur á dagskrá þingsins. (Gripið fram í.)
Herra forseti. Samkvæmt rannsóknum ríkisskattstjóraembættisins sem hafa birst í ritum þess og fræðigreinum fræðimanna þá er það staðreynd að það hlutfall launa tekjulægstu tíundanna sem fór í skattgreiðslur á árunum 2010, 2011 og 2012 var til muna lægra en það var 2007 og 2008 í frjálshyggjuskattkerfi ríkisstjórnarinnar sem nú á að fara að endurvekja í einhverju skjóli af kjarasamningum. Það eru staðreyndir.
Varðandi stöðuna um afnám hafta þá er ég ekki að mæla með óðagoti eða glannaskap og það höfum við aldrei gert, en mér finnst dapurlegt og óhyggilegt að reyna ekki að treysta samstöðu í landinu um þetta risavaxna mál. Mér duga ekki þau svör að þetta sé svo flókið og það þurfi svo mikla sérfræðinga til að undirbúa þetta að það hafi lítið upp á sig að kalla stjórnmálamenn að borðinu. Ætli verði nú ekki að taka einhverjar pólitískar ákvarðanir, velja á milli leiða o.s.frv.? Það gera tæknimenn ekki þótt sérfræðingar séu. Þessi svör hæstv. ráðherra eru haldlaus.
Herra forseti. Þetta er nú frekar einfalt í mínum huga. Þegar menn hækka skattprósentuna þá eru menn að hækka skatta. Þegar menn taka upp fjölþrepaskattkerfi með hækkandi sköttum þá eru menn að hækka skatta. Tekjutíundirnar tóku breytingum vegna þess að laun hrundu í landinu, sérstaklega efst uppi. Það er út af fyrir sig rétt að það skipti máli að lægstu tekjutíundirnar væru með lægri skattbyrði en það gerðist í sjálfu sér ekki út af því að menn lækkuðu skattana, það gerðist vegna þess að tekjusamsetningin gjörbreyttist.
Ég ætla þrátt fyrir nokkuð hvöss orð hér að vonast til þess að við náum góðri samstöðu um verklag við að taka á því máli sem er á leiðinni inn í þingið. Ég skil vel að menn kalli stíft eftir frekara samráði og upplýsingum. Menn hljóta þá að kannast við það að við höfum setið saman yfir þessum málum og við höfum lýst öllum breiðu línunum. Við höfum til dæmis farið yfir það hvernig málið hefur þroskast í vetur. Ég man eftir fundi fyrir ekki löngu síðan sem ég sjálfur sat þar sem við reyndum að draga upp breiðu (Forseti hringir.) línurnar í þessu. Svo mun sú umræða að sjálfsögðu verða tekin miklu dýpra þegar málið kemur hingað inn í þing.