Virðulegi forseti. Hér greiðum við atkvæði um frumvarp um breytingu á lögum um leigubifreiðar sem heimilar leigubílstjórum sem haft hafa atvinnuleyfi skemur en tvö ár að leggja inn atvinnuleyfið á gildistíma ákvæðisins, þ.e. út þetta ár. Frumvarpinu er einungis ætlað að tryggja jafnræði leigubílstjóra til innlagnar á atvinnuleyfi í þeim samdrætti sem orðið hefur nú vegna Covid, hvort sem leigubílstjórar hafa haft atvinnuleyfi skemur eða lengur en tvö ár. Þetta frumvarp snýr eingöngu að þessu. Önnur málefni sem snúa hvort sem er að atvinnuleysisbótum eða eftirgjöf vörugjalda leigubílstjóra eru hjá öðrum nefndum og öðrum ráðuneytum og voru því ekki til umfjöllunar í umhverfis- og samgöngunefnd sérstaklega. (Forseti hringir.) Við gerum þó grein fyrir því í nefndarálitinu (Forseti hringir.) að þessi breyting stendur óháð því.

Herra forseti. Ég kem hingað upp eingöngu vegna orða hv. þm. Karls Gauta Hjaltasonar varðandi leigubílstjórana því að við höfum einmitt orðið vör við það í hv. velferðarnefnd að þeir hafa orðið út undan og eru í einstaklega viðkvæmri stöðu þegar kemur að stuðningi stjórnvalda í þessari mjög svo erfiðu stöðu. Ég get tilkynnt það, svo það sé sagt hér líka, að minni hluti velferðarnefndar, þar sem hv. þm. Anna Kolbrún Árnadóttir, samflokkssystir hv. þm. Karls Gauta Hjaltasonar, er með á nefndarálitinu, gerir ráð fyrir því að leigubílstjórar þurfi ekki að vera í virkri atvinnuleit þegar þeir nýta stuðning hins opinbera á þessum tímum. Við erum einmitt að leggja til þær breytingar þannig að ég hvet alla sem munu greiða atkvæði í dag til að styðja þá tillögu til að tryggja réttindi leigubílstjóra líka.