Herra forseti. Velferðarnefnd var sammála um að fresta bæri samþykkt þessara ákvæða. Það er svo að við erum öll sammála um markmiðið með þessum greinum frumvarpsins en ástæða þess að við leggjum til að þær verði ekki gerðar að lögum að þessu sinni er sú að við töldum nauðsynlegt að fá betri tíma til að fara yfir þær til að tryggja líka réttindi þeirra sem eru á greiðslum frá Tryggingastofnun og til að gæta að persónuvernd. En nefndin er sammála um að mikilvægt sé að vinna að þeim markmiðum sem greinarnar kveða á um þó að þeim sé frestað að þessu sinni.

Herra forseti. Eins og sjá má styður minni hlutinn þessa grein frumvarpsins enda viljum við ekki greiða atkvæði gegn því að einhverjir fái skerðingar sínar dregnar til baka. Við hefðum kosið samt, eins og kom fram í ræðum í dag, aðra forgangsröðun, þar sem byrjað væri á þeim sem minnst hafa og breytingartillögur okkar bera merki um það. En við styðjum þessa tillögu þrátt fyrir að í umsögnum margra umsagnaraðila hafi komið fram að þær séu óheppileg leið ef pólitískur vilji standi til að innleiða kerfisbreytingar almannatrygginga.

Herra forseti. Þetta er sú tillaga sem ég talaði um að við hefðum boðað að koma með sem breytingartillögu. Hér erum við að tryggja að þeir sem minnst bera úr býtum í samfélaginu séu ekki skertir króna á móti krónu vegna sérstakrar framfærsluuppbótar og skerðingin verði 80% vegna annarra tekna frá og með 1. júlí en frá og með áramótum verði skerðingarnar 70%.

Þetta er í anda þess frumvarps sem fyrrverandi velferðarráðherra lagði fram og þingflokkur Samfylkingarinnar nú á þessu sumarþingi. Við teljum sérstaklega mikilvægt að þessi breyting nái fram að ganga enda er þetta réttlætismál fyrir þá sem hvað minnst bera úr býtum innan almannatryggingakerfisins.

Herra forseti. Ég biðst velvirðingar á þessum ruglingi en ég tel engu að síður mikilvægt að koma hér upp og vekja athygli á því að meiri hlutinn í þinginu er að hafna réttlætisbreytingum fyrir þá sem minnst hafa í samræmi við það frumvarp sem var unnið í þverpólitískri sátt um breytingu á almannatryggingakerfinu. Við teljum þetta mikilvægt réttlætismál. Við teljum óeðlilegt að við breytingar sem eru í samræmi við kosningaloforð beggja flokka um að auka hag þeirra sem hafa framfærslu sína af almannatryggingum sé meiri hluti þingsins ekki tilbúinn til að veita innan við milljarð til að þeir sem minnst bera úr býtum í kerfinu fái hærri greiðslur mánaðarlega.

Virðulegi forseti. Það er veikleiki þessa máls af hálfu ríkisstjórnarinnar að þeir sem bera eitthvað úr býtum vegna þess eru einkanlega betur settu lífeyrisþegarnir. Með þessari breytingartillögu erum við að reyna að tryggja að fólkið sem hefur lélegan lífeyri, er á almennum vinnumarkaði, er með örfáa tugi þúsunda í lífeyri, fái eitthvað út úr breytingunni, og að það fái að njóta síns litla lífeyris í vaxandi mæli í friði.

Uppleggið frá ríkisstjórninni er það að fólk sem hefur unnið alla sína ævi á almennum vinnumarkaði, er með lítinn lífeyri, á að borga með sköttum sínum líka verulega hækkun á lífeyri til þeirra sem fyrir hafa mestan lífeyri og það er ekki sanngjarnt. (Gripið fram í.) Hér er ríkisstjórnin að falla á prófinu, hún er að falla á því prófi að tryggja venjulegu fólki með lítinn lífeyri einhvern ávinning af þessum breytingum.