Forseti. Ég tek undir með hv. þingmanni sem talaði á undan mér. Mig langar að fagna því að þær aukalegu 70 milljónir sem við báðum um í nefndinni að fá inn í þennan málaflokk til að auka við samninga virðast vera komnar. Það er stórgott. Ég hlakka til að taka á málinu og klára þessi tvö stóru frumvörp á næsta ári.

Virðulegi forseti. Ég tek undir með öðrum hv. þingmönnum, það er fagnaðarefni að tekist hafi að fjölga samningunum enn meira. Ég legg þó sérstaka áherslu á það sem var algjör samstaða um í hv. velferðarnefnd, það að svokallaður öndunarvélahópur muni njóta forgangs og að tekið verði tillit til hans þegar aukafjárveitingin kemur til þannig að hægt sé að gera notendasamninga við hann strax á nýju ári.

Virðulegur forseti. Líkt og aðrir þingmenn fagna ég því að þetta sé hingað komið og í góðri sátt frá velferðarnefnd. Ég þakka líka gott samstarf við velferðarnefnd í þessu máli og vonast til þess að eiga gott samstarf við nefndina áfram í þeim tveim stóru málum sem eru í nefndinni.

Enn fremur fagna ég líkt og aðrir breytingartillögu meiri hluta fjárlaganefndar þar sem ráðgert er að auka um 70 millj. kr. í þennan málaflokk á milli umræðna. Það kom einmitt fram í nefndaráliti frá hv. velferðarnefnd og ég þakka fyrir það. Enn fremur þakka ég fyrir gott samstarf nefndarinnar og vonast til að eiga gott samstarf við hana áfram.