Herra forseti. Hér er um að ræða EES-mál sem kemur inn í gegnum samstarf okkar þar og er margt ágætt við það. Það gengur út á að reyna að skapa betri hvata fyrir þróun lyfja fyrir börn, sem er hið besta mál. Því miður er eitt í þessu sem er byggt á miklum misskilningi. Það er að gengið er út frá því, án þess að neinar raunverulegar sannanir séu fyrir því að það að lengja tíma einkaleyfis muni á einhvern hátt auka hvatana til að þróa lyf. Ég bað um upplýsingar um hvort einhver gæti rökstutt að það væri tryggt. Svörin sem ég fékk voru í formi rannsóknarritgerðar sem fjölluðu í rauninni um allt annað mál. Ég hef því enn ekki séð sannanir fyrir þessu. En engu að síður er þetta gott mál að öðru leyti. Við styðjum það.