Breyting á II. viðauka við EES-samninginn.
utanríkisráðherra (Davíð Oddsson) (S):
Virðulegi forseti. Með þessari þingsályktunartillögu er leitað heimildar Alþingis til að staðfesta fyrir Íslands hönd ákvörðun sameiginlegu EES-nefndarinnar nr. 99/2004, um breytingu á II. viðauka (Tæknilegar reglugerðir, staðlar, prófanir og vottun) við EES-samninginn og fella inn í samninginn tilskipun nr. 2002/98/EB um setningu gæða- og öryggisstaðla fyrir söfnun, prófun, vinnslu, geymslu og dreifingu blóðs og blóðhluta.
Gerð er grein fyrir efni ákvörðunarinnar í tillögunni og er hún prentuð sem fylgiskjal með henni ásamt þeirri tilskipun sem hér um ræðir. Í tilskipuninni er kveðið á um reglur er varða meðhöndlun á blóði og blóðhlutum á öllum stigum, allt frá blóðgjafa til blóðþega og til notkunar í lyfjum. Markmið tilskipunarinnar er að koma í veg fyrir útbreiðslu smitsjúkdóma við blóðgjöf og byggir hún á sjónarmiðum um almannaheilbrigði.
Í heilbrigðisráðuneytinu er nú unnið að innleiðingu tilskipunarinnar. Ég legg til að að lokinni þessari umræðu verði tillögunni vísað til hv. utanríkismálanefndar.
