heimild til að fjármagna gerð jarðganga undir Vaðlaheiði.
Frú forseti. Enginn efast um að Vaðlaheiðargöng verða góð samgönguframkvæmd og skipta máli fyrir viðkomandi hérað. Hins vegar verða menn að sækja slíkt mál á réttum og sönnum forsendum. Eins og komið hefur í ljós í umræðunni er hér um beina ríkisframkvæmd að ræða. Ég leyfi mér að vitna í nefndarálit meiri hluta umhverfis- og samgöngunefndar um samgönguáætlun þar sem segir:
„Ekki er hægt að samþykkja Vaðlaheiðargöng án samhengis við almenna forgangsröðun jarðganga í landinu enda væri þá verið að brjóta gegn sanngjörnum vinnureglum. Gerð Vaðlaheiðarganga á fyrirliggjandi forsendum riðlar eðlilegri forgangsröðun framkvæmda og kallar á uppstokkun og endurmat á þeirri nálgun sem hingað til hefur verið fylgt.“
Ef niðurstaðan verður sú að menn samþykkja að fara í Vaðlaheiðargöng þá eiga Dýrafjarðargöng og Norðfjarðargöng að koma um leið. Þau eiga að mínu mati að vera framar í þeirri brýnu forgangsröð sem Alþingi ber að afgreiða í gegnum samgönguáætlun. Ekki á að afgreiða Vaðlaheiðargöng bakdyramegin í gegnum þingið.