ýmsar forsendur fjárlagafrumvarps 2016.
Herra forseti. Þetta er hápólitískt mál og endurspeglar grundvallarhugmyndafræðilegan ágreining stjórnmálanna. Hér er það ætlun stjórnarmeirihlutans að draga enn úr tekjujöfnunaráhrifum skattkerfisins. Hér er sem sagt verið að fækka þrepum í hinu þrepaskipta skattkerfi og áfram haldið á þeirri leið að hverfa frá þeim tekjujöfnunaráhrifum sem voru samþykkt í skattkerfinu í tíð síðustu ríkisstjórnar. Þetta er grundvallarspurning um hægri og vinstri, um þá hugmyndafræði að skattkerfið sé ekki einungis tekjuöflun heldur líka tekjujöfnun og hún endurspeglaðist vel í umræðunum hér í gær. Þar af leiðandi munum við í Vinstri hreyfingunni – grænu framboði leggjast gegn fækkun skattþrepa en sitja hjá við ýmis önnur ákvæði þessa frumvarps.
Stóra málið í þessu frumvarpi er þessi grundvallarhugmyndafræðilegi ágreiningur og þar höfnum við alfarið hugmyndafræði ríkisstjórnarinnar þar sem aukinheldur getur það haft skaðleg áhrif á efnahagslíf þjóðarinnar að ganga jafn hart fram í því að veikja (Forseti hringir.) tekjustofna samfélagsins og gert hefur verið á þessu kjörtímabili og varað hefur verið við.