raforkulög og stofnun Landsnets hf.

Virðulegi forseti. Það er ekki hægt að hleypa hæstv. ráðherra héðan út eftir þetta án þess að ræða aðeins um valdframsal og Evrópska efnahagssvæðið. Tillögur þessa frumvarps eru í samræmi við skuldbindingar Íslands samkvæmt EES-samningnum, eins og hæstv. ráðherra kom inn á. Í stjórnarsáttmála ríkisstjórnarinnar segir undir kaflanum Evrópa og viðskiptakjör, með leyfi forseta:

„Ríkisstjórnin telur það vera eitt mikilvægasta hagsmunamál Íslands að sinna framkvæmd EES-samningsins vel og Alþingi þarf að vera virkara á því sviði.“

Ég vil spyrja í því samhengi, og af því að hæstv. ráðherra gefur færi á umræðu, hvernig vinna við innleiðingu á þriðja orkupakkanum gengur, þ.e. innleiðingin sem felur í sér þessar nýju valdheimildir bæði ESA og ASE, Evrópsku eftirlitsstofnunarinnar í orkumálum. Ég spyr vegna þess að þetta er eitt helsta hitamálið á norska Stórþinginu um þessar mundir. Ég held að ég fari rétt með að þetta hafi verið sett í samninginn hjá okkur í fyrra með stjórnskipulegum fyrirvörum sem væntingar stóðu til að yrði búið að aflétta fyrir árslok. Ég ætla að nota tækifærið og forvitnast um það hjá hæstv. ráðherra — sem er horfinn.