framtíð íslenskrar peningastefnu, munnleg skýrsla forsætisráðherra.
Frú forseti. Ég þakka hv. þm. Óla Birni Kárasyni fyrir ræðuna og get sagt eins og hann að ég hlakka til að fjalla nánar um þetta efni í hv. efnahags- og viðskiptanefnd.
Þingmaðurinn ræddi dálítið um að fjármálareglurnar, sem settar voru 2015, væru góðar en það vantaði í rauninni aðhaldstæki á uppgangstímum, eða þyrfti meira aðhald á uppgangstímum.
Þá langar mig að ræða aðeins við þingmanninn um þjóðarsjóðinn fyrirhugaða, hvort hann sjái í honum eða í slíku fyrirbæri möguleikann á varúðartæki til lengri tíma. Að við notum þá þennan þjóðarsjóð til þess að verða eitt af akkerunum í íslensku efnahagslífi og hagkerfinu, svipað og Norðmenn hafa gert með þjóðarsjóð sinn, og að hann verði eitt af tækjunum í kistunni, eins og hv. þingmaður kom að áðan, til þess að grípa til á niðursveiflutímum til að bregðast við aðstæðum og minnki þá að vissu leyti þörfina á öðrum groddalegri verkfærum.