orð þingmanns í störfum þingsins -- frumvarp um búvörulög.
Herra forseti. Satt best að segja verð ég að viðurkenna að ég var að vona að umrætt mál, sem fer þvert gegn neytendum, fer þvert gegn almennum samkeppnisreglum, myndi týnast í kerfinu. Ég vonaðist til þess að það myndi týnast einhvers staðar, hvort sem er hér á göngum eða í kerfinu eða annars staðar. Engu að síður er það réttur þingmanna að bera fram mál. Það er líka réttur þeirra sem hafa verið 1. flutningsmaður, sama í hvaða flokki þeir hafa verið, að bera virðingu fyrir því hver er 1. flutningsmaður hverju sinni þegar málið er efnislega algjörlega það sama á milli þinga. Mér finnst þetta sjálfsögð og eðlileg athugasemd af hálfu Miðflokksins sem kom upp áðan, þótt ég sé efnislega algjörlega á móti frumvarpinu og boða mjög harða andstöðu af hálfu Viðreisnar í því.