meðferð krónueigna sem háðar eru sérstökum takmörkunum og gjaldeyrismál.
Herra forseti. Ég þakka hv. þingmanni fyrir andsvarið. Ég verð að segja að ég hef verulegar áhyggjur af því að frumvarpið muni hafa neikvæð áhrif á gengið sem mun þá gera það að verkum að öll aðföng verða dýrari í innkaupum og lán landsmanna hækka. Það hefur áhrif á vísitöluna og verðbólgan fer af stað, vegna þess að hér er um verulegar fjárhæðir að ræða. Við erum að tala um 84 milljarða sem eiga að fara út úr landinu í formi gjaldeyris, erlends gjaldeyris.
Ég hef heldur ekki fengið nein haldbær rök fyrir því hvers vegna Seðlabankinn skýrir ekki í umsögn sinni í nefndarálitinu hvaða áhrif frumvarpið geti haft (Forseti hringir.) heldur segir einfaldlega að það komi ekki til með að hafa áhrif. Það er ekkert rökstutt. Það verða að vera einhverjar sviðsmyndir í þeim efnum eigi það að vera marktækt.