störf þingsins.

Herra forseti. Biskup Íslands gerði kristinfræðikennslu í skólum að umtalsefni fyrir skömmu. Með nýjum grunnskólalögum sem tóku gildi árið 2008 var kristinfræðikennsla felld út. Það var þáverandi menntamálaráðherra Sjálfstæðisflokksins, hv. þm. Þorgerður Katrín Gunnarsdóttir, sem mælti fyrir frumvarpinu.

Herra forseti. Ég tel mikilvægt að kristinfræðikennsla verði aftur skyldunámsgrein í grunnskólum landsins. Kristin trú hefur verið mótandi afl í íslensku þjóðlífi í 1.000 ár. Saga og menning þjóðarinnar verður vart skilin án þekkingar á kristinni trú, siðgæði og sögu kristinnar kirkju. Sérhvert þjóðfélag byggist á ákveðnum grundvallargildum. Uppeldishlutverk skólans er mikilvægt, ekki síst siðgæðisuppeldi. Skólum er ætlað að miðla slíkum gildum og í íslensku samfélagi eiga þau gildi sér kristnar rætur. Þrátt fyrir fjölmenningu á Íslandi á að taka tillit til þess hvaða trúarbrögð hafa verið ráðandi í mótun menningar okkar og samfélags. Það eru menningarleg og samfélagsleg rök fyrir því að gera kristinfræði að skyldunámsgrein á ný. Eðlilegt er að verja mestum tíma í fræðslu um þau trúarbrögð sem eru ríkjandi í samfélaginu, þ.e. kristni. Fræðsla um önnur trúarbrögð er einnig nauðsynleg svo hægt sé að byggja brýr milli annarra trúarbragða, stuðla að virðingu og skilningi.

Mannréttindadómstóll Evrópu segir að ef tiltekin trú skipi stóran sess í sögu og hefð lands þá standi ekkert í vegi fyrir því að byggja skólastarf á gildum þeim sem felast í trúnni. Í flestum Norðurlöndum er kristinfræðikennsla skilgreind sem hluti af almennri menntun. Grunnskólar í Danmörku byggja trúarbragðakennslu á kenningum dönsku þjóðkirkjunnar, siðfræði, biblíusögum og sögu kristninnar. Í Noregi segir að skólinn skuli byggja á grunngildum hins kristna arfs.

Herra forseti. Stjórnvöld eiga að standa vörð um trúar- og menningarþátt íslensku þjóðarinnar.