greiðsla kostnaðar við opinbert eftirlit með fjármálastarfsemi.
Virðulegi forseti. Ég er ekki viss um að aðhaldið kæmi endilega með því að breyta því hvernig við rukkum inn þetta gjald, hvort það færi beint í ríkissjóð eða beint í stofnunina eins og nú er. Aðhaldið held ég að verði að koma annars staðar að. Við sem sátum í þáverandi viðskiptanefnd lögðum mikla áherslu á það þegar gerð var ein stærsta breytingin á lögum um fjármálafyrirtæki sem hefur verið gerð eftir hrun að þar kæmi inn bráðabirgðaákvæði sem í raun væri mörkuð ákveðin stefna um það hvernig við vildum hafa fjármálamarkaðinn uppbyggðan. Eitt af því sem við vorum að ræða þar var sameining á Seðlabankanum og Fjármálaeftirlitinu. Því miður hefur skýrsla um þá stefnumörkun sem hæstv. efnahags- og viðskiptaráðherra hefur látið vinna ekki enn komið inn í þingið þó að hann hafi boðað að hún yrði rædd á haustdögum. Ég held að þá sé mjög brýnt að við skoðum það út frá því hvernig við getum bætt aðhald okkar með stofnuninni en ég er ekki viss um að lausnin á því sé að rukkunin á þessu gjaldi fari í gegnum fjármálaráðuneytið eins og umsögn fjármálaráðuneytisins virðist gefa til kynna.
