fjárlög 2020.

Herra forseti. Ég held að það sé verulegt áhyggjuefni, og það nær út fyrir þetta hús, hvernig hæstv. ráðherrar og hv. stjórnarþingmenn túlka lög um opinber fjármál, lög sem við settum sjálf sem ramma utan um störf okkar. 24. gr. um almenna varasjóðinn er mjög skýr og á hana ber að horfa þröngt.

Meiri hluti fjárlaganefndar beygir sig undir það sem ráðherrar segja og túlkun ráðherra á lögum um opinber fjármál. Hv. fjárlaganefnd á að vera til eftirlits og aðhalds en ekki að beygja sig undir túlkun ráðherra á lögum um opinber fjármál. Það er augljóst að ef þeirra leið verður farin erum við að brjóta þær reglur (Forseti hringir.) sem við höfum sett okkur sjálf. Það er til skammar. (Gripið fram í: Heyr, heyr.)