fjárstuðningur til minni rekstraraðila vegna heimsfaraldurs kórónuveiru.
Herra forseti. Þó að ég styðji þær breytingartillögur sem gerðar hafa verið af því að þær eru vissulega til bóta er það ekki svo að í þessum breytingartillögum séu settar skýrar skorður við því að ekki sé hægt að láta úr ríkissjóði fé til stuðnings fólki sem nýtir sér skattaskjól. Það er ekkert ákvæði sem kemur í veg fyrir það. (Gripið fram í: Það er rangt.) Það er ekkert ákvæði, öll ákvæðin sem eru sett þarna — ég hvet hv. þingmenn til að lesa skilyrðin áður en þeir greiða atkvæði og áður en þeir mótmæla því að það sé rangt sem ég er hér að segja.
CFC-reglur eru í löggjöfinni, það á að skila ársskýrslum og það á að segja hverjir eru raunverulegir eigendur. Ótakmörkuð skattskylda er á öllum þeim sem fá tekjur hér á landi. Ekkert af þessu er nýtt. Ekkert af þessu (Forseti hringir.) er skilyrði sem útilokar að úr ríkissjóði renni stuðningur til fyrirtækja sem nýta sér aflandsfélög og skattaskjól. Ekkert.
