stefnuræða forsætisráðherra og umræður um hana.

Góðir landsmenn. Nú þegar við hefjum síðasta vetur kjörtímabilsins er rétt að rifja upp hvað samstaða á breiðum grundvelli um uppbyggingu á innviðum samfélagsins var mikilvæg þegar ríkisstjórn Katrínar Jakobsdóttur var mynduð. Það átti sannarlega við um heilbrigðis- og menntamálin, líka samgöngumál, ferðaþjónustu og náttúruvernd. Þarfirnar voru brýnar en samstarf við Sjálfstæðisflokkinn eða íhaldið ekki einfalt mál. Öðru gegndi um Framsókn sem hefur átt aðild að mörgum vinstri stjórnum. Niðurstaðan er sú að í heilbrigðismálum hafa orðið róttækar breytingar og mikil uppbygging og þegar Covid-bylgjan skall yfir sýndi heilbrigðiskerfið hvað í því bjó með sveigjanleika og hugkvæmni. Hluti stjórnarandstöðunnar reynir að vísu ítrekað að tala heilbrigðiskerfið niður en sem betur fer er sá málflutningur út í hött.

En nú er mikilvægast að vinna sigur á veirunni. Ég vil nota tækifærið og þakka starfsfólki heilbrigðisþjónustunnar hvarvetna, heilbrigðisvísindafólki og ekki síst embætti landlæknis fyrir frábær störf dag og nótt. Það er mikið fram undan enn.

Margvísleg mannréttindamál hafa komið fram í tíð þessarar ríkisstjórnar og nú síðast mannréttindi intersex-barna í nýju frumvarpi sem er mál gegn afturhaldi og ömurlegum fordómum sem formaður Miðflokksins talar hér ítrekað fyrir. Það er skýrt fyrir hvað sá flokkur stendur.

Ein lykilforsenda samstarfsins er sú að forsætisráðherra er formaður VG. Það er nánast sama hvaða mál hefur komið upp. Alltaf er kallað á Katrínu Jakobsdóttur. Þá breytir engu hvort vandinn snýst um fólk á flótta eða stöðuna á vinnumarkaði. Fyrst er spurt: Hvað gerir Katrín? Hver er málstaður Vinstri grænna? Önnur fullyrða að Katrín geri bara það sem Bjarni Benediktsson vill. Ég ætla ekki að dvelja við þá djúpstæðu kvenfyrirlitningu sem í því birtist. Staðreyndin er og allir sjá að þegar vandi kemur upp hefur Katrín forystu um lausnina á sínum pólitísku forsendum. Hún hefur afl, úthald, vilja og pólitíska skerpu til að leysa flóknustu mál í góðri samstöðu, ekki bara stöku sinnum heldur alla daga aftur og aftur. Nú síðast þegar Samtök atvinnulífsins settu lífskjarasamninga í uppnám. Það er leitun að jafn öflugum leiðtoga og Katrínu Jakobsdóttur.

Fram undan er erfiður vetur, atvinnuleysi, fátækt og tekjuhrun hjá þúsundum fjölskyldna. Það er óþolandi að fjöldi fólks þurfi að bíða langtímum saman eftir mat í biðröðum. Þessu verður að breyta, það á enginn að sofna svangur í okkar ríka landi.

Nú skiptir öllu að knýja fram víðtæka samstöðu um aðgerðir til að styrkja stöðu atvinnulausra og fjölga tækifærum til atvinnu og menntunar. Þar þurfum við að fara óvenjulegar leiðir eins og að stytta vinnutíma til að dreifa vinnu til fleira fólks og með því að kalla fleira fólk til starfa í þjónustu og nýsköpun fyrir samfélagið. Það er augljóst að kosningar að ári munu fjalla um þessi mál, lífskjör almennings í víðum skilningi.

Góðir landsmenn. Samningar eiga að halda, segir forseti ASÍ. Forsætisráðherra og ríkisstjórn hennar hafa séð til þess að lífskjarasamningarnir halda. Næsta endurskoðun kjarasamninga verður í september að ári og þá verða líka kosningar. Þá verður kosið um lífskjör í landinu. Það verða lífskjarakosningar. — Góðar stundir.