tekjutenging atvinnuleysisbóta.
Herra forseti. Ég þakka hv. þingmanni fyrir. Það er auðvitað ekki þannig að þessi hópur verði fyrir skattahækkunum, eins og hv. þingmaður orðaði það. Það er ekki rétt. Þvert á móti voru hér lögfestar skattkerfisbreytingar þar sem skattar á tekjulægstu hópana lækka. Hvað varðar skerðingar hlýt ég enn og aftur að svara því til að Alþingi samþykkti tillögu hæstv. félagsmálaráðherra að draga úr skerðingum, í frumvarpi sem samþykkt var sumarið 2019. Þar var varið 2,6 milljörðum kr. til að draga úr skerðingum í örorkulífeyriskerfinu og það þrátt fyrir að ekki hafi verið gerðar neinar kerfisbreytingar á því kerfi, sem ég hef nokkrum sinnum rætt við hv. þingmenn hversu bagalegt er að Alþingi taki ekki efnislega umræðu um. Þetta er ekki gott kerfi og þarna eru víxlverkanir á milli bótaflokka sem valda óþarfaskerðingum. Það ætti að vera kappsmál okkar allra að taka þær tillögur sem unnið var að í starfshópnum sem hv. þingmaður sat í, til efnislegrar umræðu á vettvangi Alþingis þannig að við getum varið þeim fjármunum sem eyrnamerktir eru í þetta mál með sem skynsamlegustum hætti.
Hv. þingmaður spyr um 3,6% hækkun. Hún byggist á mati á áætluðum meðaltaxtahækkunum á vinnumarkaðnum í heild sinni á árinu 2021. Ég held að það sé ekki hægt að svara því öðruvísi þar sem það er skýring í fjárlagafrumvarpinu á þessum 3,6%, af því að hv. þingmaður spyr sérstaklega um það. Ég minni á að hækkunin til þessa málaflokks er u.þ.b. 18 milljarðar á þessu kjörtímabili, sem eru vegna hækkana, lýðfræðilegra breytinga og sérstaks framlags til að draga úr skerðingum á örorkulífeyri.