störf þingsins.

Herra forseti. Vægi loftslagsmálanna minnkar ekki þessa dagana. Margir töldu að áhrif Covid-19 yrðu þannig að það leiddi til minni losunar, m.a. út af samgöngum og öðru slíku, en þvert á móti jókst losun á heimsvísu en minnkaði ekki á árunum 2019 og 2020 samkvæmt nýjum tölum. Ástæðan var aukin vinnsla jarðefnaeldsneytis í orkuframleiðslu, að hluta til til að vega upp á móti neikvæðum áhrifum Covid-19.

Herra forseti. Það eru heldur ekki góðar fréttir af jöklum heims. Þeir halda áfram að minnka og nú bætir í hækkun sjávarborðs sem nemur 0,75 millimetrum á ári. Með öðrum orðum bætir verulega í. Íslenskir jöklar halda áfram að minnka. Árið 1890 var flatarmál þeirra 12.600 km², 2019 eru það 10.400 km². Þeir hafa því minnkað um 2.200 km² eða 18%.

Auðvitað eru einhverjar ljóstírur í þessu öllu saman. Bandaríkin eru komin aftur að Parísarsamkomulaginu. Önnur stórveldi, mestu mengunarvaldarnir, þ.e. Rússland, Kína og Indland, segjast miða við Parísarsamkomulagið eins og áður en þau þurfa auðvitað að sanna að þær áætlanir standist. Við hér höldum máli. Við getum minnkað samdrátt okkar um 45–50% fram til 2030 samkvæmt aðgerðaáætlun þar um.

En ég minni á að það er líka til önnur leið sem er að auka kolefnisbindingu, bæði með skógrækt og endurheimt votlendis, ég tala nú ekki um niðurdælingunni nýju sem æ oftar er verið að kynna fyrir okkur þessa dagana. Ef við stöndum við það sem við höfum samþykkt af áætlunum og gerum aðeins betur höfum við a.m.k. staðið við okkar skerf.