Alþingiskosningar 1916 – almennar þingkosningar
Konur kusu nú í fyrsta skipti til Alþingis í almennum þingkosningum en aldurstakmark kosningarréttar þeirra var 39 ár og sama gilti um þá karla sem voru vinnuhjú og höfðu öðlast kosningarrétt um leið og konurnar. Fyrr á árinu höfðu konur og vinnumenn getað tekið þátt í landskjöri.
Efnahagsleg skilyrði fyrir kosningarrétti höfðu einnig verið rýmkuð með stjórnarskrárbreytingunni 1915 þegar afnumið var að ekki hefðu aðrir kosningarrétt en þeir sem greiddu svonefnt aukaútsvar.
Konungkjör þingmanna var úr sögunni. Í stað konungkjörinna þingmanna komu sex landskjörnir þingmenn sem kosnir voru hlutfallskosningu. Landið myndaði eitt kjördæmi við landskjör. Landskjörnir þingmenn áttu sæti í efri deild Alþingis. Landskjör (hlutbundnar landskosningar) fóru fram 5. ágúst 1916. Voru þá kjörnir sex þingmenn og jafn margir varamenn þeirra.
Nú var í fyrsta sinn heimilt að greiða atkvæði utan kjörfundar samkvæmt lögum nr. 47/1914.
Flokkakerfi var enn á mótunarstigi þegar kosið var til Alþingis haustið 1916 og voru sumir frambjóðendur utan flokka en nokkuð óljóst um aðra hvaða flokki þeir tilheyrðu í raun. Einn flokkanna, Sjálfstæðisflokkurinn, hafði klofnað um afstöðu til ríkisstjórnarinnar. Voru þeir frambjóðendur flokksins sem studdu stjórnina kallaðir „langsum“ en stjórnarandstæðingar „þversum“. Þriðji hluti flokksmanna tók ekki afstöðu í málinu. Af þessum sökum voru þingmenn sem kosnir voru á þing í nafni Sjálfstæðisflokksins árið 1916 taldir í þremur flokkum í kosningaskýrslum. Auk Sjálfstæðisflokkanna þriggja gátu kjósendur valið um Alþýðuflokk, Bændaflokk, Heimastjórnarflokk, Óháða bændur og einnig frambjóðendur utan stjórnmálaflokka.
| Um kosningarnar | ||
| Kjördagur | 21. október 1916 | |
| Mannfjöldi | 89.059 | |
| Kjósendur á kjörskrá | 28.529 | |
| Hlutfall kosningarbærra af heildarmannfjölda | 37,7% | |
| Greidd atkvæði | 14.030 | |
| Kosningaþátttaka | 52,6% | |
| Hlutfall kjósenda af heildarmannfjölda | 15,7% | |
| Kosningaþátttaka karla | 69,1% | |
| Kosningaþátttaka kvenna | 30,2% | |
| Kjördæmakjörnir þingmenn | 34 | |
| Landskjörnir þingmenn | 6 | |
| Heildarfjöldi þingmanna | 40 | |
| Kosningaúrslit – kjördæmakjörnir þingmenn | ||
| Gild atkvæði | 13.350 | |
| Heimastjórnarflokkur | 40,0% | 12 þingmenn |
| Sjálfstæðisflokkur „langsum“ | 15,7% | 7 þingmenn |
| Bændaflokkur | 8,8% | 5 þingmenn |
| Sjálfstæðisflokkur | 7,6% | 3 þingmenn |
| Sjálfstæðisflokkur „þversum“ | 7,0% | 3 þingmenn |
| Alþýðuflokkur | 6,8% | 1 þingmaður |
| Óháðir bændur | 4,1% | 1 þingmaður |
| Utan flokka | 10,0% | 2 þingmenn |
| Kjördæmi og þingmenn 1916 | |
| Reykjavík | 2 |
| Gullbringu- og Kjósarsýsla | 2 |
| Árnessýsla | 2 |
| Rangárvallasýsla | 2 |
| Vestmannaeyjasýsla | 1 |
| Vestur-Skaftafellssýsla | 1 |
| Austur-Skaftafellssýsla | 1 |
| Suður-Múlasýsla | 2 |
| Seyðisfjarðarkaupstaður | 1 |
| Norður-Múlasýsla | 2 |
| Norður-Þingeyjarsýsla | 1 |
| Suður-Þingeyjarsýsla | 1 |
| Eyjafjarðarsýsla | 2 |
| Akureyri | 1 |
| Skagafjarðarsýsla | 2 |
| Húnavatnssýsla | 2 |
| Strandasýsla | 1 |
| Norður-Ísafjarðarsýsla | 1 |
| Ísafjarðarkaupstaður | 1 |
| Vestur-Ísafjarðarsýsla | 1 |
| Barðastrandarsýsla | 1 |
| Dalasýsla | 1 |
| Snæfellsnes- og Hnappadalssýsla | 1 |
| Mýrasýsla | 1 |
| Borgarfjarðarsýsla | 1 |
