2. fundur
umhverfis- og samgöngunefndar á 150. löggjafarþingi
haldinn í Austurstræti 8-10, miðvikudaginn 18. september 2019 kl. 15:08

Mættir:

Bergþór Ólason (BergÓ) formaður, kl. 15:08
Jón Gunnarsson (JónG) 1. varaformaður, kl. 15:08
Ari Trausti Guðmundsson (ATG) 2. varaformaður, kl. 15:08
Björn Leví Gunnarsson (BLG), kl. 15:08
Guðjón S. Brjánsson (GBr), kl. 15:08
Hanna Katrín Friðriksson (HKF), kl. 15:08
Karl Gauti Hjaltason (KGH), kl. 15:08
Kolbeinn Óttarsson Proppé (KÓP), kl. 15:08
Líneik Anna Sævarsdóttir (LínS), kl. 15:08
Vilhjálmur Árnason (VilÁ), kl. 15:08

Ari Trausti Guðmundsson vék af fundi kl. 15:39.
Jón Gunnarsson vék af fundi kl. 16:01.
Hanna Katrín Friðriksson vék af fundi kl. 16:06.

Nefndarritari: Inga Skarphéðinsdóttir

Bókað:

Frestað.

Formaður vísaði til þess að beiðni um kosningu formanns og varaformanna að nýju sbr. 4. mgr. 14. gr. þingskapa hefði verið samþykkt einróma á 1. fundi nefndarinnar. Þá greindi hann frá þeim tillögum sem lágu fyrir um formannsefni og bornar voru upp á þeim fundi, þ.e. Bergþór Ólason og Karl Gauta Hjaltason.

Karl Gauti Hjaltason andmælti tilnefningunni og var því Bergþór Ólason einn í kjöri.

Gengið var til kosninga.

Bergþór Ólason og Karl Gauti Hjaltason kusu Bergþór Ólason í embætti formanns.

Jón Gunnarsson, Líneik Anna Sævarsdóttir, Ari Trausti Guðmundsson, Vilhjálmur Árnason, Kolbeinn Óttarsson Proppé, Hanna Katrín Friðriksson, og Guðjón S. Brjánsson sátu hjá.

Að kosningu lokinni lagði Líneik Anna Sævarsdóttir fram eftirfarandi bókun:
Við upphaf þessa kjörtímabils var gengið frá heildarsamkomulagi milli ríkisstjórnarflokkanna og stjórnarandstöðuflokkanna um skiptingu embætta í nefndum þingsins ís amræmi við ákvæði þingskapa. Í því fólst meðal annars að tiltekin formannsembætti kæmu í hlut stjórnarandstöðunnar og skiptust þau svo milli flokkanna innbyrðis í samkvæmt þeirra samkomulagi. Meiri hluti umhverfis- og samgöngunefndar lítur svo á að í ljósi heildarsamkomulagsins sé það ekki þeirra hlutverk að taka afstöðu til þess hvernig stjórnarandstaðan hagar þessari skiptingu eða hvaða þingmenn tilnefndir eru af hálfu einstakra flokka.
Jón Gunnarsson, Ari Trausti Guðmundsson, Kolbeinn Óttarsson Proppé og Vilhjálmur Árnason tóku undir bókunina.

Ari Trausti Guðmundsson lagði fram eftirfarandi bókun:
Að gefnu tilefni ítreka ég bókun mína frá síðastliðnu vori um óhæfi Bergþórs Ólasonar til að gegna formennsku í umhverfis- og samgöngunefnd. Nú þegar siðanefnd Alþingis hefur fellt úrskurð um brot Bergþórs Ólasonar er að mínu mati óhæfi hans í sæti nefndarformanns staðfest sem aldrei fyrr.

Hanna Katrín Friðriksson lagði fram eftirfarandi bókun:
Undirrituð var meðal þeirra þingmanna sem óskuðu eftir því að siðanefnd Alþingis fjallaði um mál Bergþórs Ólasonar og fleiri þingmanna frá Klausturbarnum í lok nóvember sl. Í sumar kom niðurstaða siðanefndar, Bergþór Ólason var brotlegur við siðareglur. Með niðurstöðunni er lokið formlegri aðkomu Alþingis að málinu.
Formennska í umhverfis- og samgöngunefnd féll í hlut Miðflokksins samkvæmt samkomulagi þingflokka sem gengið var frá í upphafi kjörtímabilsins. Bergþór Ólason er áfram formannsefni þingsflokks Miðflokksins. Það er þeirra val.
Ég hef ítrekað lýst vanþóknun minni á framgöngu Bergþórs og félaga á Klaustri og sú afstaða mín hefur ekki breyst. Ég sit hjá við þessa atkvæðagreiðslu.
Guðjón S. Brjánsson tók undir bókunina.

Nefndin heimilaði Birni Leví Gunnarssyni, áheyrnarfulltrúa, að leggja fram eftirfarandi bókun:
Nei.

Bergþór Ólason lagði til að Jón Gunnarsson yrði 1. varaformaður og Ari Trausti Guðmundsson 2. varaformaður og var gengið til kosninga.

Allir viðstaddir nefndarmenn kusu Jón Gunnarsson í embætti 1. varaformanns og Ara Trausta Guðmundsson í embætti 2. varaformanns.

Á fund nefndarinnar mætti Sigurður Ingi Jóhannsson samgöngu- og sveitarstjórnarráðherra, Ingveldur Sæmundsdóttir og Sigtryggur Magnason aðstoðarmenn ráðherra og Ragnhildur Hjaltadóttir frá samgöngu- og sveitarstjórnarráðuneytinu. Kynnti ráðherra þingmálaskrá sína og svaraði spurningum nefndarmanna.

Á fund nefndarinnar mættu Guðmundur Ingi Guðbrandsson umhverfis- og auðlindaráðherra, Orri Páll Jóhannsson aðstoðarmaður ráðherra, Sigríður Auður Arnardóttir, Jón Geir Pétursson og Steinunn Fjóla Sigurðardóttir frá umhverfis- og auðlindaráðuneytinu. Kynnti ráðherra þingmálaskrá sína og svaraði spurningum nefndarmanna.

Samþykkt var að senda málið til umsagnar með 3 vikna fresti.

Fleira var ekki gert.

Hlé var gert á fundi kl. 16:08-17:04.

Fundi slitið kl. 18:02