Skiptaverðmæti og greiðslumiðlun innan sjávarútvegsins
417. mál á 141. löggjafarþingi.
Atvinnuvega- og nýsköpunarráðherra.
Markmið
Að leggja af lögboðna greiðslumiðlun sjávarútvegsins.
Helstu breytingar og nýjungar
Þótt lagt sé til að lögboðin greiðslumiðlun verði aflögð er í bráðabirgðaákvæði, með gildistíma til 1. janúar 2016, kveðið á um að fiskkaupendum sem taka við afla smábáta verði skylt að greiða allt að 0,5% af aflaverðmæti til samtaka útvegsaðila. Þá er lagt til að lög um greiðslu vátryggingariðgjalda fiskiskipa falli niður.
Breytingar á lögum og tengd mál
Breyta á lögum nr. 24/1986, um skiptaverðmæti og greiðslumiðlun innan sjávarútvegsins, og lagt er til að felld verði úr gildi lög nr. 17/1976, um greiðslu vátryggingargjalda fiskiskipa.
- Skylt mál: Skiptaverðmæti og greiðslumiðlun innan sjávarútvegsins, 741. mál (sjávarútvegs- og landbúnaðarráðherra) á 139. þingi (07.04.2011)
Kostnaður og tekjur
Hefur ekki áhrif á tekjur og gjöld ríkissjóðs.
Umsagnir (helstu atriði)
Umsagnaraðilar benda meðal annars á að verið sé að uppfæra lög sem eru orðin úreld og að breytingarnar séu ekki nema að nokkru leyti í samræmi við raunveruleikann.Afgreiðsla
Frumvarpið var samþykkt nær óbreytt.
Aðrar upplýsingar
Helsta tilefni frumvarpsins er dómur Hæstaréttar, Hrd. frá 18. október 2010, í máli nr. 504/2008 (Landssamband smábátaeigenda), þar sem talið var að skylda til greiðslu félagsgjalda til Landssambands smábátaeigenda, eins og á stóð í málinu, væri í bága við rétt manna til að standa utan félaga skv. 2. mgr. 74. gr. stjórnarskrárinnar, lög nr. 33/1944.