Samantekt um þingmál
647. mál á 149. löggjafarþingi.
Sjávarútvegs- og landbúnaðarráðherra.
Markmið
Að styrkja lagaumgjörð og stjórnsýslu fiskeldis og með því að ýta undir að fiskeldi verði sterk og öflug atvinnugrein þar sem sjálfbær þróun og vernd lífríkis er höfð að leiðarljósi.
Helstu breytingar og nýjungar
Lagt er til að heildarframleiðslumagn frjórra laxa verði byggt á áhættumati erfðablöndunar. Gert er ráð fyrir að hafsvæðum verði skipt í eldissvæði og heimiluð verði úthlutun með auglýsingu. Einnig er lagt til að stjórnsýsla verði efld og eftirlit aukið með fiskeldi. Jafnframt er gert ráð fyrir að umsóknir um rekstrarleyfi á svæðum sem ekki eru burðarþolsmetin falli niður. Gert er ráð fyrir að mælt verði fyrir um vöktun og heimild til aðgerða vegna laxalúsar. Að auki er lagt til að aukið gegnsæi verði um starfsemi fiskeldisfyrirtækja og að Umhverfissjóður sjókvíaeldis verði efldur. Gert er ráð fyrir að rekstrarleyfi fyrir ófrjóan lax verði háð nýtingu þeirra og að tekin verði upp heimild til álagningar stjórnvaldssekta. Auk þessa eru ýmis ákvæði felld úr lögum þar sem þau eiga ekki við vegna nýrra reglna um úthlutun eldissvæða eða þjóna ekki tilgangi sínum lengur.
Breytingar á lögum og tengd mál
Lög um fiskeldi, nr.
71/2008.
Lög um varnir gegn fisksjúkdómum, nr.
60/2006.
Lög um hollustuhætti og mengunarvarnir, nr.
7/1998.
Kostnaður og tekjur
Verði frumvarpið samþykkt óbreytt er gert ráð fyrir að á árinu 2020 aukist tekjur ríkissjóðs um 105 milljónir kr. og að útgjöld ríkissjóðs hækki um 175 milljónir kr. Áhrifin á ríkissjóð yrðu því 70 milljón kr. útgjaldaaukning. Hins vegar er gert ráð fyrir að tekjur af sérstakri gjaldtöku, í samræmi við 3. gr. frumvarpsins annars vegar og samkvæmt frumvarpi um gjaldtöku sem ráðuneytið áformar að leggja fram vorið 2019 hins vegar, verði nýttar til að greiða fyrir útgjaldaaukninguna, sem myndi þýða að nettóáhrif á afkomu ríkissjóðs yrðu engin á árinu 2020 né til framtíðar litið.
Afgreiðsla
Samþykkt með þó nokkrum breytingum, m.a. þeim að kveðið er á um mótvægisaðgerðir sem stofnanir, sem vinna að leyfisveitingum í fiskeldi, verða að taka tillit til og að við skiptingu fjarða eða hafsvæða í eldissvæði skuli til viðbótar við Skipulagsstofnun haft samráð við Umhverfisstofnun og svæðisráð viðkomandi svæðis. Enn fremur var samþykkt sú breyting að þeir rekstraraðilar sem sent höfðu Matvælastofnun fullnægjandi gögn um rekstrarleyfi á svæðum sem hafa verið burðarþolsmetin fá afgreiðslu samkvæmt lögunum eins og þau voru fyrir breytingu. Hið sama gildir um þau leyfi sem langt eru komin hjá Skipulagsstofnun.
Síðast breytt 02.07.2019. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.
Um samantektir
Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.
Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.
Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.
