Samantekt um þingmál
278. mál á 150. löggjafarþingi.
Dómsmálaráðherra.
Markmið
Að afnema refsingar vegna ærumeiðinga að mestu leyti og færa úrræði vegna þeirra í sérstök lög á sviði einkaréttar sem endurspegli þau sjónarmið sem leiðir af 71. og 73. gr. stjórnarskrárinnar og 8. og 10. gr. mannréttindasáttmála Evrópu.
Helstu breytingar og nýjungar
Lagt er til að sett verði sérstök lög um skaðabætur vegna ærumeiðinga þar sem mælt verði fyrir um einkaréttarleg úrræði, miskabætur og bætur fyrir fjártjón, til að bregðast við ærumeiðingum. Samhliða verði ákvæði almennra hegningarlaga um ærumeiðingar felld úr gildi.
Breytingar á lögum og tengd mál
Um er að ræða ný lög en við gildistöku laganna verða breytingar á almennum hegningarlögum, nr.
19/1940, lögum um þjóðfána Íslendinga og ríkisskjaldarmerkið, nr.
34/1944, lögum um meðferð einkamála, nr.
91/1991, lögum um meðferð sakamála, nr.
88/2008, og lögum um fjölmiðla, nr.
38/2011.
Kostnaður og tekjur
Ekki er gert ráð fyrir áhrifum á útgjöld ríkissjóðs.
Afgreiðsla
Frumvarpið var ekki afgreitt úr nefnd að lokinni 1. umræðu.
Síðast breytt 07.09.2020. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.
Um samantektir
Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.
Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.
Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.
