Viðspyrnustyrkir
334. mál á 151. löggjafarþingi.
Fjármála- og efnahagsráðherra.
Markmið
Að stuðla að því að rekstraraðilar sem hafa orðið fyrir tekjufalli vegna heimsfaraldurs kórónuveiru og aðgerða stjórnvalda til að verjast útbreiðslu hennar geti viðhaldið nauðsynlegri lágmarksstarfsemi á meðan áhrifa faraldursins gætir, varðveitt viðskiptasambönd og tryggt viðbúnað þegar úr rætist.
Helstu breytingar og nýjungar
Lagt er til nýtt úrræði, viðspyrnustyrkir, til að koma til móts við vanda rekstraraðila vegna kórónuveirufaraldursins. Lagt er til að þeir rekstraraðilar sem hafa orðið fyrir minnst 60% tekjufalli í hverjum almanaksmánuði á tímabilinu frá nóvember 2020 til og með maí 2021, samanborið við sama almanaksmánuð árið 2019, geti fengið styrk til að mæta rekstrarkostnaði. Gert er ráð fyrir að styrkurinn geti numið allt að 90% af rekstrarkostnaði en hann geti þó ekki orðið hærri en sem nemur tekjufallinu í viðkomandi mánuði. Þá er gert ráð fyrir að viðspyrnustyrkur verði ekki hærri en 400 þúsund kr. fyrir hvert stöðugildi hjá rekstraraðila og að hámarki 2 milljónir kr. ef tekjufall rekstraraðila var á bilinu 60–80% en 500 þúsund kr. fyrir hvert stöðugildi hjá rekstraraðila og að hámarki 2,5 milljónir kr. ef tekjufall rekstraraðila var meira en 80%.Breytingar á lögum og tengd mál
Um er að ræða ný lög en við gildistöku laganna verða breytingar á lögum um fjárstuðning til minni rekstraraðila vegna heimsfaraldurs kórónuveiru, nr. 38/2020.- Skylt mál: Tekjufallsstyrkir, 212. mál (fjármála- og efnahagsráðherra) á 151. þingi (16.10.2020)
Kostnaður og tekjur
Áætlað er að heildaráhrif á ríkissjóð verði líklega ekki hærri en 19,8 milljarðar kr. en þó er þetta mat háð mikilli óvissu.
